The Sun: Cristiano Ronaldo dhe Georgina Rodriguez pritet të martohen javën e ardhshme

Dasma e shumëpërfolur e Cristiano Ronaldos dhe Georgina Rodriguez duket se është më pranë se kurrë. Sipas raportimit të The Sun, çifti pritet të kurorëzojë dashurinë javën e ardhshme, pas një ndryshimi të papritur të planeve.

Fillimisht, ceremonia ishte përfolur se do të zhvillohej këtë fundjavë në pronën historike Quinta da Regaleira, në Sintra të Portugalisë. Megjithatë, sipas medias britanike, ky plan u ndryshua pasi kompleksi vazhdoi të ishte i hapur për vizitorët.

Raportimet e fundit bëjnë me dije se ceremonia do të zhvillohet në Katedralen e Funchal, në ishullin Madeira, ndërsa pritja për të ftuarit pritet të organizohet në Savoy Palace, një nga hotelet më luksoze të zonës.

Sipas The Sun, mysafirët e hotelit janë njoftuar se dy kate të plota dhe disa ambiente të përbashkëta nuk do të jenë të aksesueshme për shkak të zhvillimit të një eventi privat, detaj që ka shtuar edhe më shumë spekulimet se bëhet fjalë pikërisht për dasmën e Ronaldos dhe Georginës.

Megjithatë, deri në këtë moment, as Cristiano Ronaldo dhe as Georgina Rodriguez nuk kanë konfirmuar zyrtarisht lajmin.

Çifti është bashkë prej vitit 2016 dhe u fejua në gusht të vitit 2022, pas disa vitesh lidhjeje. Gjatë kësaj kohe kanë krijuar një familje të madhe dhe kanë qenë vazhdimisht në qendër të vëmendjes së mediave ndërkombëtare.

Nëse raportimet rezultojnë të sakta, një nga dasmat më të shumëpritura të showbiz-it dhe sportit botëror pritet të zhvillohet brenda pak ditësh.