Spartak Ngjela tregon “kurën” e tij kundër xhelozisë: “Duhet të durosh që e dashura të shkojë me një tjetër”
Spartak Ngjela ka ndarë një teori të pazakontë për dashurinë dhe xhelozinë, duke treguar se, sipas tij, mënyra për ta kapërcyer këtë të fundit është të përballesh pikërisht me situatën që të shkakton më shumë xhelozi.
I ftuar në “She’s On Air” në Top Albania Radio, avokati u pyet për marrëdhëniet sentimentale dhe mënyrën se si e ka menaxhuar vetë xhelozinë ndër vite.
Ngjela tregoi se këtë çështje e kishte diskutuar dikur edhe me një person që sot, sipas tij, mban një pozicion të lartë në politikë.
“Më pyeti një njeri që është shumë i lartë në politikë sot: ‘Si e ke bërë? Si e ke hequr xhelozinë?’”
Përgjigjja e tij ishte ajo që surprizoi moderatoret.
“Për të hequr xhelozinë, duhet të bësh një ‘antibiotik’, një ndërhyrje të madhe. Duhet të durosh që e dashura jote të shkojë me një tjetër. Kjo nuk është durim, është kurë”, u shpreh Ngjela.
Sipas tij, ky qëndrim lidhet me mënyrën se si e interpreton vetë xhelozinë. Avokati kundërshtoi shprehjen e njohur se intensiteti i xhelozisë është tregues i dashurisë.
“Filozofia më ka mësuar që xhelozia është urrejtje. Ju e dini atë thënien në Shqipëri: ‘Sa më e madhe xhelozia, aq më e madhe dashuria’, por jo. ‘Sa më e madhe xhelozia, aq më e madhe urrejtja’”, tha ai.
Biseda kaloi më pas te jeta e tij sentimentale sot. I pyetur nëse merr ftesa nga gra dhe vajza përmes Facebook-ut për t’u takuar, Ngjela u përgjigj pozitivisht dhe pranoi se në disa raste ka dalë me to.
Kur moderatoret e pyetën nëse është ai që zgjedh apo janë zakonisht gratë që bëjnë hapin e parë, avokati e lidhi situatën me faktin se është një personazh publik.
Sipas tij, të qenit i njohur u jep të tjerëve më shumë mundësi për të krijuar kontaktin e parë.
Nga mesazhet në Facebook te teoria e tij për xhelozinë, Ngjela e bëri edhe një herë bisedën për dashurinë sipas mënyrës së vet. Dhe për të, të paktën, formula është radikale: xhelozia nuk është provë dashurie, por diçka nga e cila duhet të çlirohesh.
