Si të dobësohesh pa dietë përmes 4 zakonesh

Të humbasësh peshë pa dietë dhe pa lëvizur fare tingëllon si një premtim shumë i mirë për të qenë i vërtetë. Dhe në fakt, nuk ka asnjë truk që zëvendëson një deficit kalorik, aktivitetin fizik dhe një stil jetese të shëndetshëm.

Megjithatë, ekzistojnë disa zakone që mund të ndikojnë, në një masë të vogël, te termogjeneza, procesi me të cilin organizmi prodhon nxehtësi dhe shpenzon energji. Nuk bëjnë mrekulli, por mund të japin një ndihmë të vogël kur kombinohen me ushqyerje të ekuilibruar dhe lëvizje.

Sauna me infra të kuqe
Një nga trendet më të diskutuara të wellness-it në vitet e fundit është batanija sauna me infra të kuqe, një pajisje që mbështjell trupin dhe prodhon nxehtësi të vazhdueshme, në mënyrë të ngjashme me saunën tradicionale.

Nxehtësia rrit temperaturën e trupit, stimulon djersitjen dhe qarkullimin e gjakut dhe mund të rrisë përkohësisht shpenzimin energjetik.

Disa produkte pretendojnë se një seancë prej 30 deri në 60 minutash mund të djegë qindra kalori, por këto shifra duhen parë me kujdes. Humbja e peshës që shihet menjëherë pas saunës është kryesisht humbje lëngjesh përmes djersës dhe jo humbje e drejtpërdrejtë e yndyrës trupore.

Megjithatë, sauna mund të ketë përfitime të tjera, si relaksimi muskulor, ulja e tensionit dhe përmirësimi i ndjesisë së mirëqenies.

Pirja e ujit të ftohtë
Kur pimë ujë të ftohtë, organizmi duhet ta ngrohë atë deri afër temperaturës së trupit. Ky proces kërkon një sasi të vogël energjie dhe quhet termogjenezë.

Pra, teknikisht, po, pirja e ujit të ftohtë rrit paksa shpenzimin kalorik.

Por efekti është modest. Nuk bëhet fjalë për qindra kalori dhe sigurisht nuk është një strategji më vete për dobësim.

Avantazhi më i madh i ujit mbetet hidratimi. Pirja e mjaftueshme e ujit mund të ndihmojë te kontrolli i oreksit, performanca fizike dhe funksionimi normal i metabolizmit.

Nëse uji shumë i ftohtë të shkakton shqetësime në stomak, nuk ka asnjë arsye për ta detyruar veten. Temperatura e ujit ka shumë më pak rëndësi sesa sasia që pi gjatë ditës.

Ekspozimi i moderuar ndaj të ftohtit
Edhe të ftohtit mund të ndikojë te metabolizmi përmes aktivizimit të yndyrës kafe.

Ndryshe nga yndyra e bardhë, e cila ruan energji, yndyra kafe përdor energji për të prodhuar nxehtësi dhe për të ndihmuar organizmin të ruajë temperaturën.

Disa studime kanë treguar se ekspozimi i kontrolluar ndaj temperaturave të freskëta mund të rrisë aktivitetin e këtij indi.

Kjo nuk do të thotë se duhet të futesh në ujë me akull apo të kalosh çdo mëngjes 10 minuta duke ngrirë në dush. Efekti në shpenzimin kalorik është relativisht i vogël dhe ekspozimi ekstrem ndaj të ftohtit mund të jetë i rrezikshëm për disa njerëz.

Një ambient pak më i freskët ose një ekspozim i shkurtër dhe i tolerueshëm ndaj të ftohtit është më se i mjaftueshëm nëse të pëlqen kjo praktikë.

Përtype ngadalë
Ky është ndoshta zakoni më i thjeshtë dhe më i dobishëm nga të katër.

Përtypja e ngadaltë ndihmon tretjen, e zgjat vaktin dhe i jep trurit më shumë kohë për të marrë sinjalet e ngopjes.

Nuk është e nevojshme të numërosh obsesivisht 30 përtypje për çdo kafshatë. Ideja është thjesht të mos gëlltisësh ushqimin me shpejtësi.

Kur hamë më ngadalë, shpesh konsumojmë më pak pa e kuptuar, sepse hormonet që lidhen me ngopjen kanë kohë të aktivizohen.

Disa studime sugjerojnë gjithashtu se përtypja e zgjatur mund të rrisë pak termogjenezën pas vaktit dhe të ndikojë te hormone si GLP 1 dhe PYY, të cilat ndihmojnë në kontrollin e oreksit.

Por përsëri, efekti më i madh nuk vjen nga “djegia e kalorive gjatë përtypjes”, por nga mënyra si ngrënia më e ngadaltë ndihmon kontrollin e sasisë së ushqimit.

Pra, a mund të dobësohesh “pa bërë asgjë”?

Jo në kuptimin që sugjeron titulli.

Sauna, uji i ftohtë, ekspozimi ndaj të ftohtit dhe përtypja e ngadaltë mund të ndikojnë pak te shpenzimi energjetik ose te kontrolli i oreksit, por efekti i tyre është shumë më i vogël se ai i ushqyerjes, lëvizjes, aktivitetit të përditshëm dhe gjumit.

Nëse synimi është humbja e yndyrës trupore, ajo që bën diferencën është ajo që përsërit çdo ditë: sa lëviz, sa ha, sa mirë fle dhe sa e qëndrueshme është rutina jote.

Truket mund të ndihmojnë pak.

Zakoni është ai që bën punën.