Pse Macklemore u përjashtua nga turi i Ed Sheeran? Çfarë ndodhi dhe si u përfshi Pink në polemikë

Një koncert i Ed Sheeran në New Jersey është kthyer në qendër të një prej debateve më të mëdha të momentit në industrinë e muzikës, duke përfshirë Macklemore, Pink dhe vetë Sheeran.

Gjithçka nisi më 4 shtator, kur Macklemore u ngjit në skenën e MetLife Stadium si artist hapës i Loop Tour. Gjatë performancës, reperi foli publikisht për palestinezët në Gaza dhe Bregun Perëndimor dhe përsëriti thirrjen “Free Palestine”. Ai interpretoi gjithashtu këngën e tij protestuese Hind’s Hall. 

Fjalimi shkaktoi reagime të forta. Israeli American Council nisi një peticion për largimin e tij nga turi, ndërsa disa drejtues stadiumesh kundërshtuan që Macklemore të vazhdonte të performonte në datat e ardhshme. Messina Touring Group, promotori i turit, konfirmoi se disa venue kishin bërë të ditur se nuk do ta lejonin reperin të performonte. 

Pak ditë më vonë erdhi vendimi: Macklemore nuk do të ishte më pjesë e datave të mbetura amerikane të Loop Tour.

Po çfarë roli pati Ed Sheeran?

Në deklaratën e tij, Macklemore tregoi se kishte zhvilluar disa biseda të vështira me Sheeran dhe tha se miku i tij ishte vendosur në një situatë shumë të komplikuar.

Fillimisht kjo bëri që një pjesë e kritikave të drejtoheshin edhe ndaj Ed Sheeran. Por këngëtari britanik reagoi publikisht më 15 shtator, duke thënë se vendimi nuk ishte marrë prej tij.

“Ky ishte vendimi i promotorit, jo imi”, deklaroi Sheeran, duke shtuar se kontrata e Macklemore ishte me promotorin dhe se ai vetë kishte tentuar të ndërmjetësonte mes palëve për të gjetur një zgjidhje. 

Sipas raportimeve, një nga figurat kryesore në këtë përplasje ishte Robert Kraft, pronar i New England Patriots dhe i Gillette Stadium. Macklemore pretendoi se Kraft kishte ushtruar presion që ai të mos performonte në stadium dhe kishte bindur edhe pronarë të tjerë venue-sh të vepronin njësoj. Kraft, nga ana e tij, tha se kundërshtimi lidhej me komentet e fundit të reperit dhe me ato që ai i përshkroi si një histori retorike dhe imazhesh antisemite. 

Macklemore i ka hedhur poshtë akuzat se mbështetja e tij për palestinezët është e barabartë me antisemitizëm. Në koncert ai theksoi se kritikat e tij ndaj qeverisë izraelite nuk ishin kritika ndaj hebrenjve si popull apo fe. 

Po Pink, çfarë tha?

Polemika mori një tjetër drejtim kur Pink ripostoi në Instagram një mesazh që kritikonte deklaratat e Macklemore.

Veprimi i saj shkaktoi menjëherë reagime, me një pjesë të fansave që e interpretuan si kundërshtim ndaj mbështetjes për palestinezët.

Pink më pas publikoi një deklaratë më të gjatë për të sqaruar pozicionin e saj. Ajo tha se postimi që kishte shpërndarë nuk ishte shkruar prej saj dhe se nuk do t’i kishte zgjedhur vetë të gjitha formulimet e tij. Këngëtarja foli gjithashtu për identitetin e saj hebre, dënoi Hamasin dhe njëkohësisht theksoi se mbështet dinjitetin, sigurinë dhe të drejtat e palestinezëve. 

Mesazhi i saj, tha Pink, ishte për paqe dhe për trajtimin e çdo qenieje njerëzore me dinjitet dhe respekt.

Pra përplasja mes Pink dhe Macklemore nuk është aq e thjeshtë sa “njëri pro Palestinës, tjetra kundër”. Pink kritikoi mënyrën dhe kontekstin në të cilin Macklemore kishte zgjedhur të shprehte mesazhin e tij, ndërsa më vonë sqaroi se kjo nuk nënkuptonte mohim të vuajtjeve apo të drejtave të palestinezëve. 

Ndërkohë, Ed Sheeran është përpjekur të mbajë një pozicion tjetër. Ai tha se koncertet e tij synojnë të jenë hapësira ku njerëzit mund të bashkohen pavarësisht bindjeve politike dhe se fakti që nuk flet vazhdimisht publikisht për një çështje nuk do të thotë se është indiferent ndaj saj. Ai e përshkroi vuajtjen e shkaktuar nga konflikti izraelito palestinez si një tragjedi njerëzore. 

Por largimi i Macklemore nuk e mbylli historinë.

Pas tij, disa artistë të tjerë të planifikuar për të hapur koncertet e Sheeran, mes tyre Finneas, Aaron Rowe dhe Lukas Graham, si edhe grupi Beoga që shoqëronte Sheeran në turne, njoftuan tërheqjen e tyre në solidaritet me Macklemore dhe në kundërshtim me largimin e tij. 

Në fund, ajo që nisi si një fjalim disa minutësh gjatë një koncerti është kthyer në një debat shumë më të gjerë: deri ku shkon liria e një artisti për të përdorur skenën për çështje politike, çfarë përgjegjësie kanë promotorët dhe pronarët e stadiumeve dhe ku përfundon kritika politike e ku fillojnë akuzat për gjuhë diskriminuese.

Në qendër të gjithë kësaj, Macklemore ka bërë të qartë se nuk tërhiqet nga qëndrimi i tij, ndërsa Ed Sheeran këmbëngul se largimi i reperit nuk ishte vendim personal i tij.