Princ Harry përballet me një goditje të rëndë financiare pas humbjes së padisë
Princ Harry dhe bashkëpaditësit e tij mund të detyrohen t’i paguajnë rreth 13.3 milionë dollarë kompanisë që boton Daily Mail, pasi humbën në fillim të këtij muaji padinë për shkelje të privatësisë.
Associated Newspapers Limited, e njohur si ANL, po kërkon që pagesa e përkohshme të bëhet nga Duka i Sussex-it, Elton John, Elizabeth Hurley dhe paditësit e tjerë të çështjes së ngritur në vitin 2022. Në atë padi, ata pretendonin se kompania kishte siguruar në mënyrë të paligjshme informacione private rreth tyre.
Avokati i ANL-së, Anthony White, argumentoi në gjykatë se shpenzimet ligjore të klientit të tij duhet të mbulohen nga figurat e njohura që humbën çështjen, duke nisur me një pagesë paraprake deri në përcaktimin e shumës përfundimtare.
ANL deklaroi se kishte shpenzuar më shumë se 45 milionë dollarë për procesin ligjor. Megjithatë, përfaqësuesit e paditësve, përfshirë ekipin e Harry-t, argumentuan se kjo shumë e tejkalonte buxhetin e miratuar.
Në një parashtrim me shkrim, paditësit propozuan një pagesë paraprake prej rreth 10 milionë dollarësh, në vend të 13.3 milionëve të kërkuar. Ata deklaruan gjithashtu se dispononin sigurime që mund të mbulonin më shumë se 21 milionë dollarë shpenzime ligjore.
Paditësit pranuan se, pas rrëzimit të pretendimeve të tyre, është e arsyeshme që të urdhërohen të paguajnë shpenzimet ligjore të palës fituese. Megjithatë, ata e konsideruan të tepruar si pagesën e përkohshme të kërkuar nga ANL-ja, ashtu edhe kërkesën për mbulimin e plotë të kostove.
Harry dhe paditësit e tjerë e humbën çështjen pas një beteje gjyqësore që zgjati 11 javë.
Në padinë e vitit 2022, ata akuzuan ANL-në se kishte siguruar informacione në mënyrë të paligjshme, përmes vendosjes së pajisjeve të përgjimit në automjete dhe banesa, si edhe përdorimit të detektivëve privatë gjatë periudhës nga vitet 1990 deri në vitin 2011.
Harry pretendoi konkretisht se ishte vënë në shënjestër përmes të dhënave të fluturimeve, faturave telefonike dhe përgjimit të telefonit. Megjithatë, gjykata vlerësoi se paditësit nuk arritën të paraqisnin prova të mjaftueshme, ndërsa ANL-ja i ka mohuar vazhdimisht akuzat.
Pas vendimit, Harry dhe baronesha Lawrence e cilësuan gjykimin si një përpjekje për ta «zbardhur» çështjen.
“Ne erdhëm në gjykatë duke kërkuar drejtësi dhe përgjegjësi”, deklaruan ata, duke shtuar se vendimi ishte në kundërshtim me qëndrimet e mbajtura më parë nga gjykatat në raste të ngjashme përgjimesh mediatike.
Ata kritikuan gjithashtu atë që e quajtën “mungesë koherence” të gjykatës, duke thënë se rrëzimi i provave ishte i vështirë për t’u kuptuar dhe pajtuar me logjikën e zakonshme.
