Princ Harry dhe Meghan Markle rikthehen në Britani 6 vite pas largimit nga familja mbretërore

Princi Harry dhe Meghan Markle pritet të rikthehen në Mbretërinë e Bashkuar. Fëmijët e çiftit, Princi Archie dhe Princesha Lilibet, do të regjistrohen në një shkollë në Britani, çka e bën lëvizjen më shumë se një vizitë të zakonshme familjare.

Pallati Buckingham është vënë në dijeni për këtë vendim. 

Megjithëse Mbreti Charles thuhet se mezi pret të kalojë më shumë kohë me Harry-n, Meghan-in dhe fëmijët e tyre në plan personal, burimet theksojnë se statusi i çiftit nuk do të ndryshojë.

Harry dhe Meghan nuk pritet të rikthehen si anëtarë aktivë të familjes mbretërore. Ata do të mbeten jashtë strukturës mbretërore.

Kjo lidhet edhe me qëndrimin e vendosur të Mbretit Charles për të mos lejuar një model “gjysmë brenda, gjysmë jashtë” për anëtarët e familjes mbretërore, një parim që ishte mbajtur më parë edhe nga Mbretëresha Elizabeth II.

Sipas “The Sun”, që raportoi fillimisht lajmin, çifti pritet të zhvendoset në një rezidencë jo-mbretërore dhe të vazhdojë aktivitetet e veta të biznesit.

Në janar 2020, Harry dhe Meghan tronditën opinionin publik kur njoftuan se do të tërhiqeshin nga detyrat si anëtarë të lartë të familjes mbretërore dhe do të zhvendoseshin në Montecito, Kaliforni.

Në deklaratën e tyre të asaj kohe, ata thanë se donin të krijonin një rol të ri brenda institucionit, duke u bërë financiarisht të pavarur, por duke vazhduar të mbështesnin Mbretëreshën Elizabeth II.

Çifti theksoi gjithashtu se synonte të ndante kohën mes Mbretërisë së Bashkuar dhe Amerikës së Veriut, ndërsa djali i tyre Archie do të rritej me njohjen e traditës mbretërore, por edhe me më shumë hapësirë private. Më vonë, Harry dhe Meghan u bënë prindër edhe të vajzës së tyre, Lilibet.

Një vit pas largimit nga Britania, në mars 2021, Harry dhe Meghan dhanë intervistën e bujshme për Oprah Winfrey, ku folën hapur për vështirësitë e tyre brenda familjes mbretërore.

Meghan tha se kishte hyrë në atë botë me naivitet dhe se më vonë kishte kuptuar dallimin mes “familjes” dhe “institucionit”.

Ajo tregoi se ishte ndier e pambrojtur, e izoluar dhe e vetmuar, duke rrëfyer edhe momentet e errëta të shëndetit të saj mendor gjatë periudhës në Britani.

Një nga akuzat më të forta të intervistës ishte pretendimi se disa anëtarë të familjes mbretërore kishin shprehur shqetësim për ngjyrën e lëkurës që mund të kishte Archie pas lindjes.

Princi William reagoi në atë kohë duke thënë se familja mbretërore “nuk është aspak raciste”, ndërsa Mbretëresha Elizabeth II deklaroi se çështjet e ngritura ishin shqetësuese, por se kujtimet mbi ngjarjet “mund të ndryshonin”.

Marrëdhëniet e Harry-t me familjen mbretërore u tensionuan edhe më shumë pas publikimit të librit të tij “Spare” në vitin 2023.

Në memoar, Duka i Sussex-it akuzoi Princin William për një përplasje fizike dhe përshkroi dhimbjen e tij si “rezervë” brenda sistemit monarkik.

Sipas raportimeve të mëparshme, William ishte i zemëruar dhe i lënduar nga rrëfimet e vëllait të tij, ndërsa marrëdhënia mes tyre u përshkrua nga burime pranë familjes si pothuajse e prishur plotësisht.

Edhe pse libri shkaktoi reagime të forta, Page Six raportoi në atë kohë se Harry nuk kishte pendesa për zbulimet e bëra.

Takimi me Charles dhe mungesa e kontaktit me William

Sipas artikullit, Harry dhe Meghan u ribashkuan me Mbretin Charles gjatë një vizite në Britani në korrik, moment që shënoi herën e parë pas katër vitesh që monarku takonte nipërit e tij, Archie dhe Lilibet.

Megjithatë, gjatë asaj vizite nuk pati kontakt me Princin William dhe Kate Middleton. Burime pranë situatës e përshkruan marrëdhënien mes dy çifteve si “shumë të thyer”.

Harry ka udhëtuar disa herë në Britani gjatë viteve të fundit për çështje gjyqësore, ceremoni apo aktivitete të rëndësishme, por Meghan dhe fëmijët kanë qëndruar kryesisht në SHBA.

Siguria, një nga çështjet kryesore

Në një intervistë për BBC vitin e kaluar, Harry tha se do të dëshironte pajtim me familjen mbretërore, por shprehu shqetësim për sigurinë e gruas dhe fëmijëve të tij në Britani.

Ai tha se nuk shihte një mënyrë për t’i sjellë Meghan-in dhe fëmijët në Mbretërinë e Bashkuar pa mbrojtjen e duhur.

Harry ka argumentuar prej kohësh se familja e tij përballet me rreziqe dhe kërcënime që kërkojnë masa të larta sigurie. Çështja e mbrojtjes së tij policore në Britani ka qenë pjesë e një beteje të gjatë ligjore.

Që prej largimit nga Britania, Harry dhe Meghan kanë jetuar në Montecito, Kaliforni, në një rezidencë miliona dollarëshe, duke u përpjekur të ndërtojnë një markë të re personale jashtë familjes mbretërore.

Meghan ka zhvilluar disa projekte, përfshirë podcast-in “Archetypes”, serialin e saj në Netflix “With Love, Meghan” dhe markën “As Ever”.

Megjithatë, disa prej bashkëpunimeve të mëdha të çiftit nuk kanë pasur jetëgjatësi. Marrëveshja me Spotify përfundoi në vitin 2023 pas vetëm një sezoni të podcast-it, ndërsa raportimet thonë se edhe bashkëpunimet me Netflix kanë kaluar vështirësi.

Për këtë arsye, disa komentatorë mbretërorë kanë sugjeruar se një tërheqje e përkohshme nga skena profesionale mund të ishte strategjia më e mirë për çiftin.

A është ky një fillim i ri?

Rikthimi i raportuar i Harry-t dhe Meghan-it në Britani mund të shënojë një fazë të re për familjen Sussex.

Nga njëra anë, lëvizja mund t’u japë fëmijëve të tyre më shumë afërsi me rrënjët britanike dhe me gjyshin e tyre, Mbretin Charles. Nga ana tjetër, ajo hap sërish pyetje mbi marrëdhënien e çiftit me institucionin mbretëror, me Princin William dhe me publikun britanik.

Për momentin, ajo që burimet theksojnë është se rikthimi nuk do të thotë rikthim në detyra mbretërore.

Harry dhe Meghan mund të kthehen në Britani, por jo në jetën që lanë pas në vitin 2020.