North West thotë se vitin e ardhshëm do një punë “normale”: “Dua të punoj në Starbucks”

North West mund të jetë vajza e Kim Kardashian dhe Ye, dy prej emrave më të famshëm dhe më të pasur të showbizit botëror, por duket se kjo nuk e ka penguar të ëndërrojë edhe për një eksperiencë krejt të zakonshme: të ketë një punë si gjithë të tjerët.

13 vjeçarja, e cila tashmë po hedh hapa seriozë në muzikë, performon në festivale dhe punon për projektet e saj artistike, ka treguar në një intervistë për Dazed se dëshiron të nisë punë sapo mosha t’ia lejojë.

“Unë ende dua të punoj”, tha North. “Dua të punoj, për shembull, në Starbucks vitin tjetër.”

Ideja tingëllon shumë normale për një vajzë që po hyn në adoleshencë, edhe pse realiteti i North është gjithçka tjetër veçse normal. Në Kaliforni, mosha minimale për të punuar në disa vende pune është 14 vjeç, por për Starbucks duhet të jesh të paktën 16. Dhe pastaj ekziston edhe një pengesë tjetër shumë më specifike për North: fama.

Të jesh vajza e dy prej njerëzve më të njohur në planet do ta bënte të vështirë që ajo të qëndronte qetësisht pas banakut të një kafeneje, pa turma njerëzish, paparacë apo klientë që do të përpiqeshin ta filmonin për rrjete sociale.

Megjithatë, dëshira e saj tregon diçka interesante për mënyrën si North e percepton veten. Pavarësisht se është rritur para kamerave, në tapetet e kuq dhe në eventet më ekskluzive të modës, në disa aspekte ajo duket ende thjesht një adoleshente që dëshiron të provojë gjërat që bëjnë bashkëmoshatarët e saj.

Në skenë, ndërkohë, askush nuk duket se po i kërkon të presë deri në 16 vjeç.

Gjatë kësaj vere North realizoi performancën e saj të parë solo në festivalin Summer Smash dhe madje tha se do të donte ta kishte bërë më herët.

“Po, do të doja ta kisha bërë më parë. Kam qenë gati”, tregoi ajo.

Madje mënyra si e përshkruan veten tregon se nuk është aspak tipi që pëlqen të qëndrojë pa bërë asgjë. North pranoi se dikur dilte në skenë pa bërë shumë prova, sepse i pëlqente të shihte se çfarë do të ndodhte në moment. Tani, megjithatë, ka ndryshuar qasje.

“Dikur nuk bëja prova. Doja thjesht të dilja atje dhe të shihja çfarë ndodhte. Por tani më pëlqejnë provat e kërcimit.”

Edhe dita e saj perfekte nuk ka shumë lidhje me pushimin.

“Nuk më pëlqen të pushoj shumë. Më pëlqen të bëj gjëra”, tha ajo. “Ndoshta të shkoj në prova dhe pastaj në studio. Kjo do të ishte një ditë perfekte. Ose të kem një koncert të madh, kjo do të ishte dita ideale.”

Kur Dazed e pyeti se cila ishte këshilla më e keqe që kishte marrë ndonjëherë, North nuk u mendua gjatë.

“Të filloja karrierën më vonë”, u përgjigj ajo. “Jo. Ky është hobi im, kjo është ajo që më pëlqen të bëj, kjo është ajo që dua të bëj me jetën time.”

Së fundmi ajo është shfaqur edhe në skenën e Rolling Loud përkrah Molly Santana. Për North, bashkëpunimi kishte edhe një kuptim më të gjerë, sidomos në një industri ku artistet e reja shpesh vendosen artificialisht kundër njëra tjetrës.

“Është bukur të tregosh se vajzat mund të lidhen përmes muzikës, sepse gjithmonë ka konflikte dhe drama, ndërsa me mua nuk është kështu. Unë nuk dua kurrë të kem konflikt me ndonjë vajzë.”

Pra, edhe pse një turn në Starbucks mund të mos jetë pjesë e së ardhmes së afërt të North West, dëshira për të punuar duket shumë reale. Nga provat në studio, te festivalet dhe projektet e saj, 13 vjeçarja duket se e ka të qartë një gjë: nuk dëshiron thjesht të jetë “vajza e Kim Kardashian dhe Kanye West”, por të ndërtojë diçka që e ndien si të vetën.