Nicole Kidman, si është jeta pas divorcit nga Keith Urban

Në prag të të 60-ave, që do t’i mbushë qershorin e ardhshëm, Nicole Kidman po bën bilancin jo vetëm të karrierës, por edhe të jetës së saj private.

Aktorja, të cilën publiku do ta shohë sërish më 10 shtator përkrah Sandra Bullock në vazhdimin e “Practical Magic”, po përpiqet të rimarrë veten pas divorcit nga muzikanti Keith Urban, me të cilin ishte e martuar prej gati dy dekadash.

Në një intervistë për British Vogue, ajo e përshkroi këtë fazë si një periudhë tranzicioni.

“Provoj gjëra të reja, bëj gabime, gaboj, kthehem pas, ec përpara, mirëpres dashurinë dhe e mbaj shpirtin dhe zemrën të hapur ndaj mundësive të ndryshme.”

Fituesja e çmimit Oscar ka vendosur fillimisht t’i besojë rrjedhës së emocioneve.

“Dëshira ime është të mos drejtohem nga racionaliteti”, tha ajo.

Megjithatë, pranon se nuk e kishte imagjinuar se do të arrinte në këtë pikë të jetës e vetme dhe me një të ardhme sentimentale të pasigurt.

“Nuk mbetet gjë tjetër veçse të përshtatesh”, shpjegon ajo.

Dhe duket se Kidman di ta bëjë këtë me njëfarë lehtësie.

Në fund të fundit, duhet të mendojë edhe për vajzat e saj, Sunday Rose dhe Faith Margaret, 18 dhe 15 vjeçe. Ndërsa, sipas artikullit, marrëdhëniet me Bella-n dhe Connor-in, fëmijët e adoptuar gjatë martesës me Tom Cruise, nuk do të ishin po aq të afërta.

Nga mohimi te shpresa
Periudha e dhimbjes dhe mohimit ka ekzistuar.

Në fillim të ndarjes nga Urban, Nicole nuk donte ta pranonte situatën. Vetëm më vonë kuptoi se “e vetmja rrugë e mundshme është ajo e shpresës”.

Ndërkohë, puna vazhdon.

Pas suksesit të serialit “Lioness” në Paramount+ dhe “Margo’s Got Money Troubles” në Apple TV, aktorja është e angazhuar edhe në projekte të tjera, mes tyre seriali “Discretion” dhe filmi “The Young People”.

Së fundmi është fotografuar edhe në Portofino me sipërmarrësin Michael Reinstein, por deri tani nuk ka zyrtarizuar asnjë marrëdhënie sentimentale.

Humbja e së ëmës dhe mësimet që i lanë gjurmë
Një nga momentet më të dhimbshme të viteve të fundit ishte humbja e nënës së saj, Janelle Ann, në vitin 2024.

Nicole e mori lajmin ndërsa ndodhej në Festivalin e Filmit në Venecia, ku duhej të merrte Kupën Volpi për interpretimin në “Babygirl”.

E ëma i kishte lënë shumë mësime që aktorja thotë se vazhdon t’i mbajë me vete.

Njëri prej tyre ishte se jeta është e padrejtë, por nuk ka kuptim të ankohesh vazhdimisht; më mirë të përqendrohesh te ajo që është pozitive.

Një tjetër lidhej me mëmësinë:

“Lëri fëmijët të ndjekin atë që i bën të lumtur.”

Nicole duket se e ka ndjekur këtë këshillë. Vajza e saj e madhe, Sunday Rose, ka debutuar tashmë në pasarelë për Miu Miu gjatë Paris Fashion Week.

Sot, pas një tjetër ndarjeje shumë publike dhe një periudhe të ngarkuar me humbje e ndryshime, Nicole Kidman duket se po përpiqet ta jetojë të ardhmen pa e kontrolluar plotësisht.

Jo duke pretenduar se e di çfarë vjen më pas, por duke e mbajtur, siç thotë vetë, “zemrën të hapur ndaj mundësive”.