Nga lapsusi në altar te fustani i dytë sekret: çfarë ndodhi në dasmën e Lady Diana-s dhe Charles-it

Më 29 korrik 1981, Lady Diana Spencer dhe atëherë Princi Charles u martuan në Katedralen e St Paul, në një ceremoni që u kthye në një nga ngjarjet televizive më të ndjekura të shekullit XX.

Rreth 750 milionë njerëz e ndoqën dasmën në televizion, mbi 600 mijë dolën në rrugët e Londrës dhe 2.500 të ftuar morën pjesë në ceremoni. Kishte 27 torta, një fustan me bisht pothuajse tetë metra të gjatë dhe gjithë ceremonialin e një martese të destinuar të hynte në histori.

Por pas imazhit të “përrallës mbretërore” kishte edhe gabime, detaje të fshehura dhe episode që, parë sot, e bëjnë atë ditë shumë më interesante.

Diana e ngatërroi emrin e Charles-it në altar

Edhe pse ceremonia ishte provuar deri në detaj, emocionet bënë të vetën.

Gjatë betimeve martesore, Diana ngatërroi rendin e emrave të bashkëshortit të ardhshëm dhe tha “Philip Charles Arthur George” në vend të “Charles Philip Arthur George”.

Edhe Charles bëri një lapsus.

Në vend që të thoshte “të ofroj të mirat e mia materiale”, ai tha “të ofroj të mirat e tua materiale”.

Dy gabime të vogla në një ceremoni të ndërtuar për të qenë pothuajse perfekte.

Ekzistonte edhe një fustan i dytë, krejtësisht sekret

Fustani i Diana-s u realizua nga David dhe Elizabeth Emanuel dhe u mbajt sekret deri në momentin kur nusja mbërriti në St Paul.

Por stilistët kishin përgatitur edhe një plan B.

Nga frika se dizajni kryesor mund të zbulohej përpara dasmës, ata krijuan një fustan të dytë rezervë, gjithashtu sekret, që do të përdorej vetëm në rast se modeli i parë do të dilte në publik para kohe.

Në fund nuk pati nevojë.

Fustani rezervë ndryshonte në disa detaje, sidomos te mëngët, që ishin më pak voluminoze, dhe te fundi, i punuar me një shtresë të dyfishtë materiali të qëndisur.

Fustani që hyri në histori

Sot mund të duket maksimalist, por në vitin 1981 fustani i Diana-s ishte thuajse manifesti i estetikës së dekadës.

Tafetë mëndafshi në ngjyrë fildishi, dantellë, tulle, perla, qëndisje dhe një bisht pothuajse tetë metra të gjatë.

Në atë kohë ishte bishti më i gjatë i parë ndonjëherë në një dasmë mbretërore.

Por gjithë ai material solli edhe një problem praktik: fustani duhej të futej brenda karrocës.

Për pasojë, kur Diana mbërriti në katedrale, veshja ishte dukshëm e rrudhur, diçka që shihet qartë edhe në fotografitë e asaj dite.

750 milionë njerëz përpara televizorit

Në vitin 1981 nuk kishte rrjete sociale, livestream apo TikTok, por dasma e trashëgimtarit të fronit britanik ishte një event global.

Thuhet se rreth 750 milionë njerëz e ndoqën ceremoninë në televizion.

Mbi 600 mijë persona u mblodhën në rrugët e Londrës për të parë çiftin, ndërsa 2.500 të ftuar morën pjesë në ceremoninë fetare.

Recepsioni, përkundrazi, ishte shumë më intim: rreth 120 të ftuar.

Pse mbreti Charles dhe mbretëresha Sofia munguan

Edhe pse marrëdhëniet mes monarkive britanike dhe spanjolle ishin të mira, Juan Carlos I dhe mbretëresha Sofia vendosën të mos merrnin pjesë.

Arsyeja lidhej me faktin se Charles dhe Diana kishin përfshirë Gjibraltarin në itinerarin e muajit të mjaltit.

Duke qenë se territori ishte dhe mbetet objekt tensioni diplomatik mes Britanisë dhe Spanjës, çifti mbretëror spanjoll zgjodhi të mungonte.

Menuja ishte relativisht klasike, tortat jo

Dreka e dasmës përfshinte gatime tradicionale britanike, ndër to peshk turbot me salcë karavidhesh dhe fileto pule të mbushur me mousse qengji, një nga pjatat e preferuara të Diana-s.

Por spektakli i vërtetë erdhi te ëmbëlsirat.

U përgatitën 27 torta të ndryshme.

Torta kryesore e dasmës ishte rreth një metër e gjysmë e lartë dhe peshonte afërsisht 90 kilogramë. Ajo u realizua nga David Avery, chef në Royal Naval Cookery School.

Puthja në ballkon që u kthye në traditë

Charles harroi ta puthte Diana-n pas përfundimit të ceremonisë fetare.

Puthja erdhi më vonë, në ballkonin e Buckingham Palace, përpara turmës.

Ai moment, që nuk ishte pjesë e protokollit tradicional, u kthye më pas në një nga imazhet më ikonike të dasmave mbretërore.

Vite më vonë, William dhe Kate, si edhe Harry dhe Meghan, do të ndiqnin të njëjtën traditë të puthjes publike pas ceremonisë.

“Diçka e re, diçka e vjetër, diçka e huazuar dhe diçka blu”

Edhe veshja e Diana-s respektonte traditën e famshme të nusërisë.

Në vend të një tiarë nga koleksioni mbretëror britanik, ajo zgjodhi Spencer Tiara, tiarën e familjes së saj, të realizuar me ar, argjend dhe diamante. Ajo përfaqësonte “diçka të huazuar”.

“Diçka e re” ishte një patkua i vogël prej ari dhe diamantesh, i qepur në fustan si simbol fati.

“Diçka e vjetër” ishte dantella që kishte qenë pronë e Mbretëreshës Mary of Teck.

Ndërsa “diçka blu” ishte një fjongo e vogël e qepur brenda brezit të fustanit.

Sekreti romantik i këpucëve

Edhe këpucët e Diana-s ishin bërë posaçërisht për dasmën.

Taka u projektua me kujdes që ajo të mos dukej më e gjatë se Charles.

Këpucët ishin të zbukuruara me rreth 500 paillettes dhe mbi 130 perla.

Por detaji më personal ishte fshehur brenda.

Në shollë ishin qëndisur inicialet “C” dhe “D”, të bashkuara nga një zemër e vogël.

Një simbol romantik, i padukshëm për publikun, në një martesë që nga jashtë dukej si përrallë, por që me kalimin e viteve do të tregonte një histori shumë më të ndërlikuar.