Ky është fustani që u krijua live mbi trup me një spray tekstili

Ka momente në modë që kanë shenjuar histori. Një prej tyre ishte nata kur Bella Hadid doli në pasarelë dhe një ekip teknikësh filloi të spërkaste mbi trupin e saj një material të lëngshëm, që brenda pak minutash u shndërrua në fustan. Publiku nuk po shihte vetëm një veshje, por të gjithë procesin e krijimit.

Fustani nuk u qep në atelier dhe nuk u prezantua i gatshëm. Ai u ndërtua live, në kohë reale, mbi trup. Një përzierje mes teknologjisë së materialeve dhe performancës artistike. Trupi u kthye në kanavacë, dhe procesi — në spektakël.

Për të krijuar fustanin, i cili u prezantua gjatë Javës së Modës në Paris në vitin 2022 dhe që ishte pjesë e koleksionit Pranverë/Verë 2023 të Coperni, u përdor një teknologji e quajtur “Fabrican”, një tekstil i lëngshëm që ngurtësohet në kontakt me lëkurën dhe përmban fibra pambuku e polimere.

Coperni tregoi se teknologjia nuk është më vetëm në backstage, por ajo është pjesë e dukjes. Moda nuk është më vetëm rroba, por është kthyer në një eksperiencë. Dimensioni tjetër është intimiteti i momentit. Trupi i zhveshur që gradualisht mbulohet në heshtjen e publikut, është një proces që krijon suspancë dhe tension.

Fustani me spray i Coperni-t nuk është diçka që do ta shohim nesër në dyqane. Sepse ai nuk përfaqëson një artikull të zakonshëm mode, por një moment që tregoi se në një industri që shpesh duket e parashikueshme, ka ende hapësirë për surprizë. Dhe kjo është arsyeja pse ai moment mbeti në histori.