Dhjetë vite martesë dhe asnjë zënkë. Kështu deklaron George Clooney, i cili në një intervistë për CBS Mornings rrëfeu me humor: “Ende po kërkojmë një arsye për të grindur.” Martuar që prej vitit 2014 me avokaten dhe juristen e njohur Amal Alamuddin, Clooney është babai i dy binjakëve – Ella dhe Alexander – dhe duket se po jeton një histori dashurie pa asnjë re në horizont.
View this post on Instagram
Por a është mungesa e konflikteve gjithmonë një tregues i shëndetshëm i një marrëdhënieje?
Sipas ekspertëve të Psychology Today, grindjet – kur ndodhin në mënyrë të ndërtuar dhe jo destruktive – mund të jenë madje një shenjë e një marrëdhënieje të fortë. Diskutimet e hapura, të sinqerta dhe të respektuara, shërbejnë si kanale për të shprehur nevoja, ndjesi apo mospajtime që, nëse lihen të mbledhin pluhur, mund të kthehen në pakënaqësi të thella dhe distancim emocional.
Psikologia Elena Benvenuti e shpjegon kështu: “Kur një çift nuk grindet kurrë, mund të jetë sepse të dy po shmangin konfliktin për të ruajtur një ekuilibër të brishtë. Ndoshta njëri apo të dy partnerët po heqin dorë nga shprehja e ndjenjave, nevojave apo mospajtimeve për të kënaqur tjetrin ose për shkak të frikës nga humbja.”
Në thelb, mungesa e zënkave nuk nënkupton domosdoshmërisht harmoni – ndonjëherë ajo flet për heshtje që mbulon tensione të pathëna.
Por si mësohet “të zihesh mirë”? “Çelësi është komunikimi i sinqertë dhe i respektueshëm,” shpjegon Benvenuti. “Të flasësh në vetën e parë – ‘Unë ndjej…’, ‘Kam nevojë për…’ – në vend që të fajësosh tjetrin, është një mënyrë për të ulur mbrojtjen dhe për të krijuar hapësirë për mirëkuptim dhe empati.”
Zënkat, në këtë dritë, nuk janë shenja dështimi – por mundësi për rritje. Janë ndalesa në rrugën e një dashurie të vërtetë, ku partnerët rishikojnë, rinegociojnë dhe e njohin më mirë njëri-tjetrin.
Kështu që ndoshta George dhe Amal thjesht po e jetojnë një përjashtim të bukur – ose ndoshta po mbajnë shumë gjëra për vete. Në të dy rastet, ndoshta nuk është mungesa e zënkës që përcakton shëndetin e një çifti, por sa të lirë ndihen të thonë të vërtetën e tyre. Edhe kur ajo nuk është e ëmbël.
