Një Johnny Depp krejtësisht i ri shfaqet në foton e parë zyrtare të “Day Drinker”, filmi më i ri i regjisorit Marc Webb (i njohur për versionin live-action të “Borëbardhës”), që pritet të mbërrijë së shpejti në kinematë botërore.
Larg pamjes së zakonshme prej rockstar-i me të cilën publiku e ka identifikuar prej vitesh, Depp shfaqet këtë herë elegant, me flokë gri dhe stil të rafinuar – dhe për herë të katërt në karrierën e tij, përkrah Penélope Cruz.
Filmi, i cili po xhirohet aktualisht në Spanjë, rrëfen historinë e një baristeje në një jaht luksoz (Madelyn Cline) që njeh një të ftuar misterioz (Depp). Por shumë shpejt, të dy përfshihen në një rrjet krimi, ku figura qendrore është një kriminele enigmatike që interpretohet nga Cruz. Mes personazheve lind një lidhje e papritur, që askush nuk do ta kishte imagjinuar.
“Jam i entuziazmuar që po fillojmë xhirimet me Johnny, Madelyn, Penélope dhe këtë kast të jashtëzakonshëm. Jemi në një vend magjepsës, me një ekip fantastik dhe një histori të fortë e emocionuese për të treguar. Do të jetë një aventurë e bukur”, u shpreh regjisori Marc Webb.
Në film marrin pjesë gjithashtu Manu Ríos, Arón Piper, Anika Boyke dhe aktori argjentinas Juan Diego Botto. Skenari është shkruar nga Zach Dean dhe prodhimi mban firmën e producentëve të sagës “John Wick”.
Me këtë projekt, shpresohet të nisë një rikthim i plotë i Johnny Depp në majat e kinemasë, pas periudhës së vështirë që përjetoi me procesin gjyqësor kundër ish-bashkëshortes Amber Heard — një moment që jo vetëm ndaloi karrierën e tij, por vuri në pikëpyetje edhe figurën e tij artistike dhe njerëzore.
