Nga momenti që një personazh bëhet pjesë e Big Brother VIP, ai nuk është më një individ me jetën e tij private, por një projekt kolektiv i komenteve, analizave dhe supozimeve të publikut. Dhe Olsi Bylyku e ka ndjerë këtë në çdo formë të mundshme.
I ftuar në “The Dalina Show”, aktori dhe moderatori u përball me pyetjet pa filtra të Dalina Buzit, e cila nuk ngurroi ta sfidonte me kuriozitetin që publiku ka krijuar për të lidhur me raportin e tij me Egli Takon.
“Ti je zgjuar një ditë me komente ‘i mallkuar qofsh’ dhe të nesërmen me ‘lum si ti’,” – i tha Dalina, duke përmbledhur më së miri absurditetin e botës virtuale.
Por në vend që të ndalej tek opinioni i njerëzve për Eglin, Olsi tregoi se kishte diçka tjetër që e kishte befasuar më shumë. “Ajo që më shqetësoi më shumë ishte fakti që nuk kishte asnjë koment për partneren time aktuale,” – tha ai, duke nënkuptuar se publiku ishte ende i fiksuar pas një historie të përfunduar, duke anashkaluar realitetin e tij të tanishëm.
Megjithatë, Olsi nuk e la këtë fakt ta shqetësonte. Ai shtoi: “Pastaj mendova që nuk ka problem, se mirënjohjen ia shpreh vetë.”
“Kam shumë respekt dhe mirënjohje për atë gocën dhe i uroj fitoren,” - shtoi ai, duke nënvizuar se ndonëse gjithçka ishte përqendruar te e kaluara, askush nuk kishte përmendur njeriun që ka pranë sot.
