“Sonte dua të jem një festë për jetën,” kishte thënë vetëm disa orë më parë gjatë konferencës për shtyp, dhe Bianca Balti e bën pikërisht këtë që nga momenti kur shfaqet në majë të shkallëve të Aristonit, e mirëpritur si bashkëprezantuese e natës së dytë të Festivalit të Sanremos 2025. Pas debutimit të djeshëm, që theu rekorde, përkrah Antonella Clerici-t, sonte është radha e supermodeles nga Lodi të shoqërojë Carlo Conti-n dhe Gerry Scotty-n në prezantimin e këngëtarëve në garë dhe të ftuarve specialë.
Plot buzëqeshje dhe energji, Bianca transmeton pozitivitetin e saj te publiku në sallë dhe te miliona shikues që e ndjekin nga shtëpia. Për disa orë, nuk ka vend për dhimbjen apo për sëmundjen e zbuluar shtatorin e kaluar – është vetëm ajo, e veshur me fustanet e saj të ëndrrave, duke transmetuar një qetësi dhe një dritë që magjeps të gjithë. Zbret shkallët, ndalet, shijon momentin që do të donte të mos mbaronte kurrë dhe përgatitet të fitojë, siç thotë vetë, garën e saj personale të elegancës.
Veshja e parë e Bianca Balti në Sanremo 2025
Pas dymbëdhjetë vitesh nga debutimi i saj i parë në këtë skenë në 2013, Bianca rikthehet me një look të krijuar enkas për të nga Drejtori Kreativ i Valentino-s, Alessandro Michele. Fustani, në nuancat e kaltërt, dallohet për bishtin e gjatë dhe dekoltenë e thellë në formë “V”, të zbukuruar me detaje paillettes të ndritshme mbi supe. Një krijim që përforcon ndjesinë e butësisë dhe elegancës me të cilën ajo prezantohet përpara reflektorëve. Bianca zgjedh të mos mbajë as paruke dhe as të mbulojë kokën, duke e kompletuar pamjen me doreza të zeza prej tyli dhe vathë Bulgari. E sinqertë dhe pa filtra, është thjesht ajo – më autentike se kurrë.
Veshja e dytë e Bianca Balti në Sanremo 2025
Ndryshon fustani, por jo niveli i elegancës. Për daljen e saj të dytë, Bianca zgjedh një fustan të gjatë sirenë në një nuancë të thellë blu nga Giorgio Armani Privé, i mbuluar me një shkëlqim mahnitës paillettes. Edhe ky fustan ka një dekolte të thellë në formë “V”, ndërsa buzëqeshja dhe shkëlqimi i kristaleve argjendi e bëjnë akoma më magjepsës. Sandalet e ndërthurura në nuancat e blusë, firmosur nga René Caovilla, plotësojnë këtë festë të hijeshisë dhe klasit.
Veshja e tretë e Bianca Balti në Sanremo 2025
Një ëndërr e qëndisur me kristale dhe copëza pëlhure të tejdukshme – fustani i saj i tretë është një shi dritash që mbështjell trupin e modeles, i lirë dhe plot jetë. Detajet me perla përhapen në të gjithë krijimin e Fendi Couture, i punuar mbi një bazë mëndafshi me nyje delikate në bust. Pjesa e poshtme lë të dukshme këmbët, ndërsa dekolteja e drejtë me rripa të hollë të lidhur pas qafës i jep një prekje të lehtë dhe të rafinuar. Autoironike dhe e lirshme, Bianca emocionon dhe surprizon pa ekzagjerime, duke lënë që bukuria e saj natyrale të shkëlqejë edhe më shumë se fustani i saj madhështor.
Veshja e katërt e Bianca Balti në Sanremo 2025
Një surprizë e minutës së fundit: Bianca ngjitet me nxitim në skenë për të prezantuar këngën e Rose Villain, e veshur me një krijim të guximshëm dhe sensual, sërish të mbuluar me paillettes vezulluese. Dekolteja e kryqëzuar krijon një detaj të hapur në pjesën e bustit, duke zbuluar me krenari shenjën e operacionit të saj – një simbol i betejës që po përballon me forcë. Por jo për të zgjuar mëshirë, siç ka thënë vetë në intervistat e saj, por për të dhënë kurajë dhe mbështetje për ata që ndodhen në të njëjtën situatë.
