Vrasja e Martin Canit/ Gjykata e Apelit rrëzon kërkesën për ndryshim të masës së sigurisë, lë në burg Mario Përlleshin
Gjykata e Apelit në Tiranë ka rrëzuar kërkesën e të miturit Mario Përlleshi për zëvendësimin e masës së sigurisë "arrest në burg". Përlleshi ndodhet në burgun e të miturve në Kavajë, pasi akuzohet për vrasjen e 14-vjeçarit Martin Cani pranë shkollës "Fan Noli" në Tiranë.
Ngjarja e rëndë ndodhi më 18 tetor, kur Martin Cani u qëllua me thikë nga bashkëmoshatari i tij, Mario Përlleshi, pas një konflikti që nisi në oborrin e shkollës dhe u përshkallëzua jashtë saj. Si pasojë e plagëve të marra, Martin Cani humbi jetën në spital.
Në seancën e zhvilluar në Gjykatën e Apelit, avokati i të miturit kërkoi zbutjen e masës së sigurisë, duke argumentuar se klienti i tij e kishte kryer veprën në kushte vetëmbrojtjeje dhe kishte frikë për gjendjen e tij shëndetësore. Nga ana tjetër, Prokuroria kërkoi që të mituri të mbetej në "arrest me burg" deri në përfundimin e hetimeve. Gjykata vendosi të lërë në fuqi masën e sigurisë "arrest në burg" për të miturin, duke e konsideruar si më të përshtatshme për rrethanat e çështjes.
