Elon Musk lë pas Bernard Arnault, bëhet sërish njeriu më i pasur në botë

Elon Musk ka rifituar pozicionin e tij si personi më i pasur në botë.

Të paktën kështu thuhet sipas një raporti të ‘Bloomberg’, i cili vlerësoi se vlera neto e CEO të Tesla tani është rreth 192 miliardë dollarë, krahasuar me 187 miliardë dollarë të CEO të LVMH, Bernard Arnault.

Dy centiliarderët, një term i përdorur për t'iu referuar njerëzve me pasuri më shumë se 100 miliardë dollarë, kanë qenë kokë e kokë për vendin e parë për muaj të tërë. Këtë javë, pasuria e Arnault ra pas një rënie të aksioneve të LVMH të mërkurën, sipas llogaritjeve të ‘Bloomberg’.

Arnault e kaloi Musk në dhjetor, pasi pasuria e tij u rrit për shkak të një bumi në shitjet e mallrave luksoze që ndihmoi në rritjen e çmimit të aksioneve të LVMH. LVMH, një nga konglomeratet më të mëdha në botë, është shtëpia e markave përfshirë Louis Vuitton, Dior dhe Celine.

Ndërkohë, Musk ka shijuar një rritje meteorike në listat e të pasurve në botë vitet e fundit, pasi pasuritë e tij janë të lidhura drejtpërdrejt me ato të Tesla, prodhuesit të automjeteve elektrike. Pasuria e tij më e madhe është nga aksionet e kompanisë, nga të cilat ai zotëron rreth 13%, sipas ‘Bloomberg’.

Jashtë Tesla-s, Musk është gjithashtu CEO i SpaceX, firma e eksplorimit të hapësirës dhe pronar i rrjetit social Twitter.

Aksionet e LVMH janë rritur 19.7% këtë vit, ndërsa Tesla janë rritur 65.6%.