Shkon në 50 numri i viktimave dhe në 2700 ai i të plagosurve nga shpërthimi në Bejrut

Dy shpërthime të mëdha tronditën të martën Bejrutin, duke vrarë të paktën 50 njerëz, duke plagosur mijëra të tjerë dhe krijuar tonditje në gjithë qytetin, ku u copëtuan dritaret, rrëzuan dyert dhe u tronditën ndërtesa. Qindra shtëpi mbetën të pabanueshme si pasojë e shpërthimeve.

Mijëra njerëz kërkuan trajtim në spitale, në të cilët u krijua kaos për shkak të numrit të madh të njerëzve që kishin nevojë për trajtim. Ministri i Shëndetësisë, Hamad Hassan, bëri me dije se numri i konfirmuar i vdekjeve ka shkuar në 50, dhe të paktën 2.700 njerëz janë të plagosur.

Disa orë pas shpërthimit, shkaku mbetet i paqartë. Ndërsa Izraeli mohoi përgjegjësinë dhe tha se forcat e saj nuk kishin kryer një sulm, madje bëri me dije se kishte ofruar ndihmë humanitare dhe mjekësore.

Raportimet fillestare sugjeruan që shkak ishte bërë një depo fishekzjarresh. Shefi i sigurimit libanez, Abbas Ibrahim, fajësoi më vonë kimikatet e djegshme të depozituara në një depo. Ministri i brendshëm, Mohamed Fahmi, tha që nitrati i amonit ka qenë në mesin e materialeve të ruajtura dhe bëri thirrje për një hetim se si u ndez.

Kryeministri i Libanit, Hassan Diab, e shpalli të mërkurën një ditë kombëtare zie.

Burimi: The Guardian

Lexoni edhe:

Video/ Shpërthim i fuqishëm në Bejrut, të paktën 10 viktima, qindra të plagosur dhe njerëz nën rrënoja