Monica Bellucci: “Të plakesh do të thotë të kesh fatin të jesh ende gjallë dhe të kesh një të ardhme përpara”
Aktorja italiane sapo ka mbushur 62 vjeç dhe nuk i trembet kalimit të viteve. “Pjekuria sjell me vete një dhuratë të mrekullueshme: aftësinë për t’i parë gjërat me më shumë distancë.”
Nga Città di Castello, në Umbria, Monica Bellucci arriti të bëhej një emër i njohur në mbarë botën. Aktorja, e cila mbushi 62 vjeç më 30 shtator, mbetet një ikonë e bukurisë mesdhetare, e admiruar ndërkombëtarisht. Vitet që kalojnë nuk e trembin. Përkundrazi, ajo sheh edhe atë që fitojmë prej tyre.
Në një intervistë për edicionin spanjoll të Harper’s Bazaar, Bellucci tregoi se si e përjeton këtë fazë të jetës.
“Të plakesh do të thotë të kesh fatin të jesh ende gjallë dhe të kesh një të ardhme përpara”, u shpreh ajo.
Aktorja, nënë e dy fëmijëve, shtoi: “Duhet thënë edhe se pjekuria sjell me vete një dhuratë të mrekullueshme: aftësinë për t’i parë gjërat me më shumë distancë. Ndonjëherë, me kalimin e viteve, nuk je më vetëm aktore, por bëhesh edhe spektatore e botës. Dhe kjo të lejon ta shohësh gjithçka nga një këndvështrim tjetër”.
Gjithnjë e më shumë gra mbi 60 vjeç po bëjnë paqe me moshën
Gra si Monica Bellucci, që arrijnë ta pranojnë dhe ta vlerësojnë moshën në të cilën ndodhen, po shihen gjithnjë e më shpesh. Këtë e vëren edhe dr. Carlo Borriello, kirurg i nofullave dhe fytyrës, mjek i estetikës dhe drejtues mjekësor i Medical Beauty Spot në Lucca, Milano dhe Maltë.
“Nuk bëhet fjalë vetëm për një ide të re të bukurisë, por edhe për një ndryshim kulturor në mënyrën se si gratë e shohin fytyrën dhe moshën e tyre. Në klinikat e mjekësisë estetike, të cilat në shumë raste pasqyrojnë edhe ndryshimet në shoqëri, po vërejmë një kalim gradual nga ndërhyrjet që synojnë ta transformojnë fytyrën dhe të luftojnë me çdo kusht plakjen, si fytyrat e ngrira, pa mimikë, apo përdorimi i tepruar i fillerëve, drejt një qasjeje që respekton shumë më tepër identitetin e saj”, shpjegon ai.
“Trajtimet me injeksione nuk duhen demonizuar, por është inkurajuese të shohësh se gjithnjë e më shumë gra të moshës së Monica Belluccit e kuptojnë se më pak është më shumë. Po tregohet më shumë përmbajtje në ndërhyrje dhe synimi ka ndryshuar: të harmonizohen tiparet, jo të fshihen shenjat e kohës.”
Vëmendja, sipas tij, po zhvendoset gjithnjë e më shumë te rigjenerimi i lëkurës, cilësia e saj dhe ulja e inflamacionit.
“Gratë mbi 60 vjeç nuk kërkojnë më domosdoshmërisht të duken më të reja. Duan një fytyrë të freskët, të mirëmbajtur dhe plot gjallëri, pa humbur tiparet e tyre dalluese. Ky nuk është thjesht një ndryshim në mënyrën si i themi gjërat. Do të thotë të ndalosh së ndjekuri një imazh ideal dhe të mësosh të vlerësosh atë realin.”
Për Borriellon, ky ndryshim pasqyron edhe një vetëdije më të madhe për marrëdhënien me veten.
“Fytyra nuk shihet më si diçka që duhet korrigjuar e transformuar rrënjësisht, por si pjesë e historisë personale. Si diçka për të cilën mund të ndihesh krenare. Në këtë kuptim, ikona si Monica Bellucci ndihmojnë që të bëhet e dëshirueshme një ide e bukurisë që nuk e mohon kalimin e kohës, por e pranon me vetëdije si pjesë të saj. Duke zbuluar edhe të mirat që sjell mosha.”
