Miri thumbon Selinin pas intervistës?
Një postim i Mirit ka rikthyer vëmendjen te raporti i tij me fituesen e "Big Brother VIP Albania 5", Selin Bollati.
Pak orë pasi Selini ishte e ftuar në emisionin "Pushime On Top", ku foli për rrugëtimin e saj në shtëpinë më të famshme në Shqipëri, këngëtari publikoi një mesazh në InstaStory që u interpretua nga ndjekësit si një thumbim i tërthortë ndaj saj.
"Dhelpra kur nuk i kapi rrushët, sigurisht që ishte i prishur. Kështu që thuajeni me zë të lartë se kush ju çoi në finale, se nuk është turp! Ps. Tfala nga 006-ta", shkroi Miri.
Edhe pse ai nuk përmendi asnjë emër, koha e publikimit dhe referenca për finalen bënë që postimi të lidhej menjëherë me deklaratat e Selinit në intervistën e saj.
Gjatë javëve të para të "Big Brother VIP Albania 5", Selini dhe Miri krijuan një nga aleancat më të forta të shtëpisë. Megjithatë, me zhvillimin e lojës, raporti mes tyre u përkeqësua, duke u shoqëruar me debate dhe përplasje të vazhdueshme.
Pavarësisht tensioneve, të dy arritën deri në finalen e madhe, ku Selin Bollati u shpall fituese e edicionit, ndërsa Miri e mbylli garën në vendin e dytë.
Deri më tani, Miri nuk ka sqaruar nëse mesazhi ishte vërtet një reagim ndaj Selinit, ndërsa as fituesja e BBVA 5 nuk ka komentuar publikisht postimin e tij.
