Meghan Markle tregon jetën e re në Britani, publikon pamjet e para me Harry-n dhe fëmijët
Meghan Markle ka hapur për herë të parë një dritare drejt jetës së re të familjes së saj në Mbretërinë e Bashkuar, vetëm pak javë pas rikthimit në Angli së bashku me Princin Harry dhe dy fëmijët e tyre.
Në një video të publikuar në Instagram, Dukesha e Sussex-it ka përmbledhur disa momente të përditshmërisë së familjes, shumë larg ceremonive mbretërore dhe vëmendjes që ka shoqëruar rikthimin e tyre.
Në pamje, Meghan dhe Harry shfaqen duke ecur dorë për dore në natyrë, ndërsa Princesha Lilibet, 5 vjeç, nget biçikletën dhe Princi Archie, 7 vjeç, vrapon pranë saj. Një tjetër fragment tregon një prej fëmijëve duke ngrohur këmbët pranë oxhakut, ndërsa Harry shihet në një varkë të vogël duke peshkuar në liqen me fëmijët.
Meghan nuk e shoqëroi videon me ndonjë deklaratë. Zgjodhi vetëm dy emoji, flamurin britanik dhe një zemër, një detaj që u interpretua si një sinjal i thjeshtë për kapitullin e ri të familjes në Angli.
Pamjet vijnë pak ditë pasi Dukesha u fotografua në Cotswolds, në një prej daljeve të para publike që prej rikthimit. Sipas raportimeve, ajo u pa duke pirë çaj në Soho Farmhouse, klubin privat të njohur në zonë.
Dalja ka marrë vëmendje edhe për shkak të raportimeve se Harry dhe Meghan po kërkojnë një shtëpi në Cotswolds, duke ngritur mundësinë që familja të vendoset pikërisht në këtë zonë rurale pranë Londrës.
Rikthimi në Britani vjen ndërkohë në një moment delikat për marrëdhënien e çiftit me familjen mbretërore.
Harry u shfaq publikisht në Londër më 7 shtator, ndërsa më pas u raportua për një komunikim të bërë në emër të Mbretit Charles lidhur me pozicionin e çiftit pas kthimit.
Sipas raportimeve, qëndrimi i Pallatit mbetet i pandryshuar: Harry dhe Meghan nuk rikthehen si anëtarë aktivë të familjes mbretërore dhe nuk do të kryejnë detyra zyrtare në emër të monarkisë. Ata vazhdojnë jetën e tyre si figura private, me aktivitetet e tyre tregtare dhe bamirëse.
Edhe statusi HRH mbetet pjesë e titujve të tyre, por sipas marrëveshjes së vendosur pas largimit nga detyrat mbretërore, çifti nuk e përdor atë zyrtarisht.
Harry dhe Meghan u rikthyen në Mbretërinë e Bashkuar më 26 gusht, ndërsa është raportuar se këtë herë qëndrimi i tyre do të jetë më i gjatë. Sipas informacioneve që kanë qarkulluar në mediat britanike dhe amerikane, Archie dhe Lilibet janë regjistruar gjithashtu në një shkollë private përgatitore.
Megjithatë, në videon e Meghan nuk ka asgjë nga tensionet me Pallatin, diskutimet për titujt apo spekulimet mbi marrëdhëniet brenda familjes mbretërore.
Ka vetëm fshat, biçikleta, peshkim, shëtitje dhe mbrëmje pranë zjarrit.
Pas gjithë zhurmës që ka shoqëruar rikthimin e tyre, Meghan duket se ka zgjedhur ta prezantojë vetë kapitullin e ri të Sussex-ëve. Jo përmes një deklarate, por me një lloj “soft launch” të jetës së tyre të re britanike.
