Kush është Juna Ademi, shqiptarja që i preu flokët ikonike Erling Haaland?

Një ndryshim në pamjen e Erling Haaland ka bërë xhiron e rrjetit, por bashkë me futbollistin norvegjez, në qendër të vëmendjes është vendosur edhe një emër shqiptar.

Sulmuesi i Manchester City-t ka surprizuar fansat duke i dhënë fund flokëve të gjatë bjondë që prej vitesh ishin kthyer në një nga tiparet më karakteristike të imazhit të tij. Në vend të tyre, Haaland ka zgjedhur një prerje shumë më të shkurtër, një transformim që menjëherë ndezi debat mes ndjekësve.

Pas këtij ndryshimi që po komentohet kudo qëndron Juna Ademi, një parukiere shqiptare që prej vitesh jeton dhe punon në Monako.

Në videon e publikuar në kanalin e YouTube të futbollistit, Juna shihet gjatë gjithë procesit të transformimit. E buzëqeshur, por edhe paksa e tensionuar, siç pranon vetë gjatë videos, ajo nis prerjen e flokëve që për vite me radhë ishin bërë pjesë e identitetit publik të Haaland.

Vendimi i futbollistit për t’i prerë ishte aq drastik, sa procesi u dokumentua nga fillimi deri në fund dhe u prezantua si një lloj fillimi i ri për sezonin.

Reagimet e fansave ishin të menjëhershme. Disa e pëlqyen versionin e ri të Haaland, ndërsa të tjerë kërkuan rikthimin e pamjes së tij ikonike me flokët e gjatë.

Megjithatë, përtej debatit mbi stilin, vëmendjen e mori edhe profesionistja shqiptare që realizoi transformimin.

Juna Ademi është vendosur prej vitesh në Monako, ku ka ndërtuar karrierën e saj në industrinë e bukurisë dhe hairstyling-ut. Tashmë, falë një prej prerjeve më të komentuara të momentit në botën e sportit, emri i saj po qarkullon shumë përtej klientelës së zakonshme.

Nga Monako në ekranet dhe rrjetet sociale të miliona fansave të futbollit, një prerje flokësh mjaftoi që Juna Ademi të bëhej një nga shqiptaret më të komentuara të momentit.