Jennifer Garner rrëfen panikun pas divorcit nga Ben Affleck
Jennifer Garner ka folur hapur për një anë të divorcit nga Ben Affleck që publiku rrallë e lidh me yjet e Hollywood-it: frikën financiare.
Aktorja, e cila për vite kishte ngadalësuar karrierën për t’iu përkushtuar rritjes së fëmijëve, tregoi se pas përfundimit të martesës e pushtoi paniku kur kuptoi se duhej të siguronte vetë të ardhurat e saj dhe të mendonte seriozisht për të ardhmen profesionale.
“Papritur mendova: ‘Prit pak. Duhet të kujdesem për veten. Duhet të kujdesem për këta fëmijë. Nuk mora ndonjë shumë marramendëse nga divorci’”, tregoi ajo në podcastin “Aspire” me Emma Grede.
Garner, sot 54 vjeçe, finalizoi divorcin nga Affleck në vitin 2018. Ajo pranoi se në momentet e para pas ndarjes u frikësua, jo vetëm për paratë, por edhe sepse kuptoi sa shumë ishte tërhequr nga puna gjatë viteve të martesës.
“Panikosa kur dola nga martesa dhe kuptova sa shumë isha tërhequr nga karriera ime”, tha ajo.
Një tjetër shqetësim ishte mosha. Garner e dinte shumë mirë se Hollywood-i nuk është një industri që domosdoshmërisht bëhet më bujare me aktoret ndërsa kalojnë vitet.
“Papritur kuptova se nuk e dija edhe për sa kohë do të mund të punoja. Kjo nuk është një karrierë ku të thonë: ‘Je 60? Je 55? Je 43? Hajde, tani do të të paguajmë më shumë se kurrë’.”
Përveç kësaj, tashmë si nënë beqare, ajo nuk mund të pranonte çdo projekt që i ofrohej. Nuk ishte më e mundur të largohej për gjashtë muaj nga Los Angeles dhe të xhironte në një vend tjetër, duke lënë pas tre fëmijët që ka me Affleck, Violet, Seraphina dhe Samuel.
Dhe bashkë me këtë erdhi një tjetër frikë: si do të mund të ruante mënyrën e jetesës që familja kishte pasur gjatë martesës?
Garner e përshkroi shumë qartë paradoksin e të qenit e famshme dhe njëkohësisht e pasigurt financiarisht.
“Nuk është se mund të heqësh dorë nga fama dhe papritur të bëhesh e panjohur”, tha ajo. “Jeta është e shtrenjtë dhe përsëri duhet të kuptosh si do të jetosh. Fakti që njerëzit të njohin nuk do të thotë se dikush po të garanton automatikisht një jetë të mirë.”
Aktorja pranoi se para ndarjes nuk kishte menduar shumë për paratë. Por pas divorcit, ideja se duhej të bëhej vetë personi që siguronte të ardhurat e saj mori një rëndësi krejt tjetër.
“U bë shumë serioze për mua, shumë shpejt, ideja se duhej të isha dikush që fitonte para.”
Pikërisht ajo periudhë pasigurie e shtyu Jennifer Garner të përfshihej më seriozisht në biznes.
Në vitin 2017 ajo u bë bashkëthemeluese dhe drejtuese e markës së ushqimeve organike për fëmijë dhe bebe Once Upon a Farm.
Vendimi rezultoi shumë më i madh sesa mund ta kishte imagjinuar në fillim. Kompania doli në bursë në shkurt 2026 me një vlerësim prej rreth 724 milionë dollarësh.
Sipas Fortune, Garner fitoi rreth 1 milion dollarë nga kompania vetëm gjatë vitit të kaluar dhe pritet të fitojë nga 2 deri në 3 milionë dollarë në vit deri në vitin 2028.
Në njëfarë mënyre, frika se karriera e saj si aktore mund të mos ishte e përjetshme e shtyu të ndërtonte një burim tjetër pavarësie financiare.
Garner dhe Ben Affleck u njohën gjatë xhirimeve të “Pearl Harbor” në vitin 2000 dhe u martuan pesë vjet më vonë.
Gjatë martesës, ajo vazhdoi të luante në filma si “Elektra”, “Juno” dhe “Dallas Buyers Club”, por me ardhjen e fëmijëve mori një hap të madh pas nga puna për të qenë më e pranishme në shtëpi.
Çifti njoftoi ndarjen në vitin 2015, pas dhjetë vitesh martesë.
Edhe gjatë procesit të divorcit, Garner vazhdoi të punonte në disa projekte, mes tyre “Miracles from Heaven” dhe “Love, Simon”. Pas finalizimit të divorcit, erdhën role të tjera në “Wonder Park”, “The Adam Project”, “Deadpool & Wolverine” dhe së fundmi “The Five Star Weekend”.
Sot marrëdhënia me Ben Affleck është shumë më e qetë
Nëse pas divorcit Garner kishte frikë se përgjegjësia për fëmijët do ta kufizonte profesionalisht, sot ajo thotë se situata ka ndryshuar falë marrëdhënies së mirë të bashkëprindërimit që ka krijuar me Affleck.
Për serialin e ri “The Five Star Weekend”, për shembull, aktorja duhej të largohej për një muaj në Nantucket. Fillimisht hezitoi ta pranonte rolin pikërisht për shkak të fëmijëve, por më pas kuptoi se mund të mbështetej te ish bashkëshorti.
“Ata mund të qëndrojnë me babanë e tyre”, tha ajo. “Ai kujdeset për ta. Është një partner i jashtëzakonshëm në këtë aspekt. Dhe kjo të jep shumë liri.”
Garner ka folur edhe më parë me shumë respekt për Affleck si baba. Në Ditën e Babait publikoi disa fotografi të tij me fëmijët dhe shkroi: “Shoh mënyrën si fëmijët e mi e adhurojnë babanë e tyre dhe jam e lumtur për ta. Të duash dhe të të dojë një baba i mirë është një dhuratë.”
Historia e saj, në fund, është më pak për një yll Hollywood-i që “kishte frikë se mos mbetej pa para” dhe më shumë për atë moment të njohur për shumë gra që kanë lënë mënjanë një pjesë të karrierës për familjen: çfarë ndodh kur një ditë duhet të rikthehesh dhe të kuptosh se siguria që kishe nuk është më aty?
Për Jennifer Garner, përgjigjja ishte të fillonte përsëri të fitonte vetë, të rindërtonte karrierën dhe, paralelisht, të krijonte një biznes që sot vlen qindra milionë dollarë.
