Ilary Blasi flet për herë të parë për Noemi Bocchi dhe Totti-n: “Shpresoj të paktën të ketë vlejtur gjithë kjo”

Pjesëmarrja e Noemi Bocchi në Ballando con le stelle nuk ka kaluar pa u vënë re dhe ka rikthyer sërish në qendër të vëmendjes trekëndëshin mediatik që prej vitesh lidh emrat e saj, Francesco Totti-t dhe Ilary Blasi-t.

Ballando con le stelle nuk është vetëm një nga programet kult të televizionit italian, me një histori 20 vjeçare, por edhe një përzierje e vazhdueshme mes spektaklit, personazheve publikë dhe gossip-it. Edicioni i ri, i nisur më 4 tetor në prime time në Rai 1, ka një protagoniste mbi të cilën janë përqendruar menjëherë sytë e publikut: Noemi Bocchi, partnerja aktuale e Francesco Totti-t.

Në perceptimin publik, emri i saj është lidhur prej kohësh edhe me fundin e martesës mes ish kapitenit të Romës dhe Ilary Blasi-t, me të cilën Totti ka tre fëmijë.

Me pjesëmarrjen në Ballando, Noemi duket se dëshiron të tregojë një tjetër anë të vetes dhe të dalë nga roli me të cilin është identifikuar mediatikisht gjatë viteve të fundit. Në intervistat promocionale, ajo ka zgjedhur të mos e përmendë kurrë Ilary-n, të cilën mediat e gossip-it e kanë paraqitur shpesh si “rivale”.

Ilary Blasi, nga ana tjetër, ka folur disa herë për fundin e martesës së saj me Totti-n. E ka bërë në dokumentarin Unica në Netflix, në librin autobiografik Che stupida, të botuar në vitin 2024, dhe gjatë rikthimit të saj në Grande Fratello Vip në vitin 2026, ku nuk mungoi as një batutë për ish bashkëshortin dhe partneren e tij.

Por këtë herë, e nxitur pikërisht nga gjithë vëmendja mediatike që ka shoqëruar pjesëmarrjen e Noemi Bocchi në Ballando con le stelle, Ilary ka folur drejtpërdrejt për të në një intervistë për Sette, suplementi i Corriere della Sera.

“Shpresoj të jenë të lumtur. Të paktën të ketë vlejtur”
Kur u pyet çfarë mendonte për Noemi Bocchi në Ballando con le stelle, Ilary nuk u zgjat shumë.

“Çfarë mendoj? Shpresoj që ajo të jetë e lumtur, që të jenë të lumtur. Vërtet. Të paktën të ketë vlejtur gjithë kjo.”

Një fjali e shkurtër, por që mbart shumë më tepër nga sa thotë në pamje të parë.

Pas saj janë vite ndarjeje, përplasjesh, akuzash reciproke dhe një fund martese që përfundoi në gjykatë dhe në faqet e para të mediave italiane.

Megjithatë, keqardhja e Ilary-t nuk duket se është sentimentale. Ajo vetë sapo është martuar me partnerin Bastian Muller, ndërsa edhe Totti dhe Bocchi përfliten prej kohësh si një çift që mund të shkojë drejt martesës.

Pra, të dy duket se kanë ecur përpara.

Pika më e ndjeshme mbeten tre fëmijët e ish çiftit: Cristian, Chanel dhe Isabel.

Në intervistë, Ilary u ndal edhe te mënyra si ajo dhe Totti janë përpjekur t’i mbrojnë gjatë viteve të vështira të ndarjes.

“Disa zgjedhje i kam bërë edhe instinktivisht”, tha ajo. “Në këtë pikë, interesi ynë i përbashkët ishte të mbronim, më vjen edhe për të qeshur ta them, sa më shumë të ishte e mundur, fëmijët.”

“E nisëm me këtë qëllim, pastaj...”
Ilary shpjegoi se sot i vjen për të qeshur kur kujton synimin fillestar për t’i mbajtur fëmijët larg konfliktit, sepse, sipas saj, gjërat më pas morën një drejtim krejt tjetër.

“E nisëm me këtë qëllim, pastaj, si ta them... mirë, pra...”

Dhe e la aty.

Jo sepse Blasi njihet si një person që kursen fjalët. Përkundrazi, ajo është e njohur pikërisht për spontanitetin dhe batutat e menjëhershme.

Por në këtë rast, ndoshta sepse pyetja prekte drejtpërdrejt fëmijët, zgjodhi të mos shkonte më tej dhe të mos rikthente gjithë atë që fshihet pas atij “mirë, pra...” ku duket se ka përmbledhur vite të tëra vendimesh, gabimesh dhe përplasjesh të bëra shumë publike.

“Fëmijët nuk kanë asnjë faj”
Ilary foli edhe për pushimet e para që tre fëmijët kaluan me Totti-n dhe Noemi Bocchi-n me rastin e 50 vjetorit të ish futbollistit, të festuar në Las Vegas në fund të shtatorit.

Kur u pyet nëse i kishte bërë fëmijët të ndiheshin në faj që kishin shkuar me të atin dhe partneren e tij, Blasi ishte kategorike.

“Jo, por çfarë faji kanë ata? Është diçka që e kemi krijuar ne. Ata nuk kanë absolutisht asnjë faj, Zot na ruaj, aspak. Të paktën këtë peshë nuk e kanë mbajtur mbi vete.”

Për Ilary-n, fëmijët duhet të qëndrojnë jashtë problemeve të të rriturve.

Ajo ka theksuar se Cristian, Chanel dhe Isabel vazhdojnë të kenë marrëdhënie të rregullta me të dy prindërit dhe me partnerët e tyre të rinj.

Edhe Totti ka folur për periudhën e vështirë me fëmijët
Në librin e tij autobiografik Oltre, publikuar më 22 shtator, edhe Francesco Totti është rikthyer te periudha e vështirë që pasoi ndarjen nga Ilary dhe daljen publike të marrëdhënies me Noemi Bocchi.

Në veçanti, ai rrëfen reagimin e vajzës së dytë, Chanel, e cila e kishte përjetuar shumë keq situatën.

Sipas rrëfimit të tij në libër, ajo i kishte thënë: “Je një copë m..., më neverit.”

Marrëdhënia mes tyre kaloi më pas një periudhë të gjatë tensioni, por fotot e fundit të Totti-t me fëmijët në Las Vegas sugjerojnë se sot është arritur një ekuilibër i ri.

Edhe fjalët e Ilary-t duket se shkojnë në të njëjtin drejtim.

Dramat e së shkuarës vazhdojnë të rikthehen në media, herë nga gazetat, herë nga vetë protagonistët, por për jetën e tyre të përditshme duken tashmë shumë më pak qendrore se më parë.

Dhe ndoshta pikërisht këtu merr kuptim fjalia e Ilary-t:

“Shpresoj të jenë të lumtur. Të paktën të ketë vlejtur gjithë kjo.”

Sepse sot, me të dy të vendosur në marrëdhënie të reja dhe me fëmijët që duket se kanë gjetur një ekuilibër më të qëndrueshëm, ndoshta fundi i një historie ka bërë vend për dy jetë të reja.