Gruaja e Michael Schumacher rrëfehet pas vitesh: “Edhe sot, kur dëgjoj këngën tonë, qaj”
“Hurry, hurry, lover, come to me”.
Janë vargjet e Rush Rush, këngës së Paula Abdul të vitit 1991. Pikërisht në atë periudhë nisi historia e dashurisë mes Michael Schumacher dhe Corinna Betsch, një lidhje që u bë publike një vit më vonë, u kurorëzua me martesë në vitin 1995 dhe më pas me ardhjen në jetë të dy fëmijëve të tyre, Gina Maria dhe Mick.
Kanë kaluar më shumë se tri dekada që prej fillimit të historisë së tyre. Dhe që nga aksidenti i rëndë me ski në Méribel, në dhjetor 2013, Corinna Schumacher ka zgjedhur pothuajse gjithmonë heshtjen, duke mbrojtur me shumë kujdes privatësinë e bashkëshortit të saj.
Pas aksidentit, ish kampioni i Formula 1 kaloi muaj në koma dhe që atëherë familja ka dhënë shumë pak informacione mbi gjendjen e tij shëndetësore.
Në vitin 2021, në dokumentarin Schumacher, Corinna kishte thënë një nga frazat më të njohura për të: “Michael na mungon të gjithëve. Por Michael është këtu. Është ndryshe, por është këtu. Dhe kjo, besoj, na jep forcë.” Tani ajo rikthehet të flasë me rastin e dokumentarit të ri të Netflix, Schumacher ’94: La nascita di una leggenda, që publikohet më 2 tetor.
Corinna kujton se ajo dhe Michael kishin një stol të veçantë ku uleshin gjithmonë vetëm, sa herë që kishin diçka për të sqaruar mes tyre.
“Nëse unë ngrija zërin, ai bëhej gjithnjë e më i qetë dhe më i heshtur”, tregoi ajo.
Pastaj foli për Rush Rush.
“Ajo ishte kënga jonë në atë kohë. Nëse e dëgjoj sot ndërsa jam në makinë, qaj vetëm, në heshtje.”
Një fjali e thjeshtë që përmbledh një marrëdhënie prej më shumë se tridhjetë vitesh.
“Zemra ime vrapon me të kur fiton. Dhe edhe kur humbet. Zemra ime është gjithmonë aty”, tha Corinna.
Letrat e fansave dhe të brendshmet që i vinin me postë
Corinna kujtoi edhe anën më të lehtë të viteve kur Michael Schumacher ishte në kulmin e famës së tij.
Piloti merrte një numër të madh letrash nga fanset.
“Njëra madje i dërgonte të brendshme me postë”, tregoi ajo.
Një fanse e quajtur Jutta ishte aq këmbëngulëse sa, me kalimin e kohës, shprehja “Forca, Jutta!” u kthye në një batutë të përsëritur të Schumacher.
Në fillim, megjithatë, marrëdhënia mes Corinna-s dhe Michael-it nuk ishte pritur mirë nga të gjithë.
Nëna e saj ishte “krejtësisht kundër”.
Sipas Corinna-s, ajo i thoshte se familja Schumacher kishte një pistë go kartësh pranë shtëpisë dhe se aty largonin këdo që bënte diçka gabim.
“Dhe ai ishte gjithmonë pas timonit”, kujtoi ajo.
Gara që ndryshoi gjithçka
Dokumentari kthehet edhe te viti 1994, kur Michael Schumacher fitoi titullin e tij të parë botëror në Formula 1.
Por ai sezon lidhet edhe me një nga fundjavat më të errëta në historinë e sportit: Grand Prix i San Marinos, ku humbën jetën Roland Ratzenberger dhe Ayrton Senna.
Corinna kujton se pikërisht atëherë ajo dhe Michael e kuptuan për herë të parë sa seriozisht i rrezikshëm mund të ishte ky sport.
“Aty kuptuam për herë të parë se gjërat po bëheshin vërtet të rrezikshme”, tha ajo.
Corinna do të kishte preferuar që gara të mos zhvillohej.
“Edhe Michael tha se nuk duhej të garohej. Por nëse vendimi është ‘do të garojmë’, atëherë duhet të garosh.”
Pas më shumë se tridhjetë vitesh së bashku, dhe më shumë se një dekade nga aksidenti që ndryshoi jetën e familjes Schumacher, Corinna vazhdon të flasë shumë rrallë për bashkëshortin.
Por kur e bën, nuk janë detajet mjekësore ato që zgjedh të ndajë.
Janë një stol ku flisnin vetëm të dy.
Një këngë.
Një kujtim.
Dhe një zemër që, siç thotë vetë ajo, vazhdon ende të vrapojë me të.
