Georgina Rodríguez u përgjigjet komenteve për peshën

Georgina Rodríguez ka reaguar publikisht ndaj komenteve për pamjen e saj fizike, vetëm pak ditë para dasmës së shumëpërfolur me Cristiano Ronaldon.

Modelja dhe sipërmarrësja, e cila prej vitesh është në qendër të vëmendjes mediatike, vendosi të thyejë heshtjen pas valës së komenteve që morën fotografitë e saj gjatë pushimeve verore me futbollistin portugez në Mallorca.

Përmes një mesazhi të gjatë në Instagram, Georgina foli për ndryshimet që ka kaluar trupi i saj ndër vite dhe për mënyrën se si i sheh standardet e bukurisë.

“Trupi im do të ndryshojë, ashtu siç ndryshon trupi i çdo gruaje. Dhe shpresoj të vazhdojë të ndryshojë edhe për shumë vite, sepse kjo do të thotë se jam ende gjallë”, shkroi ajo.

Modelja kujtoi edhe rolin e saj si nënë, duke theksuar se dëshiron t'u transmetojë vajzave të saj një mesazh krejt tjetër nga ai që shpesh imponojnë rrjetet sociale.

“Jam nëna e gjashtë fëmijëve të mrekullueshëm, tri prej të cilëve janë vajza që një ditë do të bëhen gra të jashtëzakonshme.

Dhe nëse ka diçka që dua t’u mësoj, së bashku me Cris-in, për të cilin jam thellësisht krenare për vlerat që përfaqëson si baba dhe si burrë, është se vlera e një personi nuk mund të varet kurrë nga pamja fizike apo nga mendimi i të panjohurve.”

Georgina tha se çdo verë përballet me të njëjtin fenomen, ku trupi i saj bëhet objekt diskutimi në internet.

“Disa komentojnë trupin tim, ndërsa të tjerë më mbrojnë.

Gjëja interesante është se kjo ndodh çdo verë. Çdo vit trupi im kthehet sërish në lajm.

Dhe më pas pyes veten: ku është standardi? Kush vendos se cili është trupi ‘i duhur’? A vazhdojmë vërtet të besojmë se lumturia ka një masë?”

Në vijim të mesazhit, ajo shprehu dashurinë dhe mirënjohjen për trupin e saj, duke theksuar gjithçka që ai i ka mundësuar të përjetojë.

“I dua format e mia. E dua lirinë për të jetuar në trupin që zgjedh. Në trupin që më mbështet, që më ka lejuar të përqafoj, të sjell jetë, të rrëzohem dhe të ngrihem përsëri.

Një trup që meriton respekt, dashuri dhe mirënjohje në të gjitha versionet e tij.”

Georgina tregoi gjithashtu se në këtë periudhë ka marrë mbështetje edhe nga Cristiano Ronaldo, i cili e ndihmoi të mos ndikohej nga komentet negative.

“Po flisja me Cris-in dhe i thashë: ‘Jam e shqetësuar që tani po më quajnë të shëndoshë, sepse unë jetoj përmes imazhit tim’”, rrëfeu ajo.

Sipas Georginës, përgjigjja e Ronaldos ishte ajo që i duhej në atë moment.

“Ti nuk jeton nga imazhi yt. Ti jeton nga ajo që je. Një grua e mrekullueshme, e bukur, me një trup të bukur, nënë, njeri i mirë, e suksesshme dhe që e jeton jetën me dashuri. Çfarë mund të kërkosh më shumë? Është normale që të të kenë zili.”

“Herë pas here, të gjithë kemi nevojë për dikë që të na kujtojë se çfarë ka vërtet rëndësi”, përfundoi ajo.