Eli Fara rikthehet në skenë pas ditëve të vështira, këngëtarja vijon angazhimet muzikore

Eli Fara po rikthehet para publikut vetëm pak ditë pas vëmendjes së madhe mediatike që pasoi publikimin pa pëlqimin e saj të materialeve private.

Këngëtarja e njohur ka bërë të ditur përmes një postimi në Instagram se do të performojë sot në një koncert në Tiranë, ku do të ndajë skenën me disa artistë të tjerë të njohur shqiptarë.

Duke rishpërndarë njoftimin e aktivitetit, Eli ka konfirmuar se do t’i vijojë normalisht angazhimet e saj profesionale, pavarësisht situatës së rëndë me të cilën është përballur gjatë ditëve të fundit.

Rikthimi në skenë vjen pasi artistja reagoi publikisht për qarkullimin e pamjeve private, duke theksuar se nuk ndiente turp dhe se përgjegjësia u përkiste personave që kishin publikuar dhe shpërndarë materialet.

Në këtë periudhë, Eli ka marrë mbështetje të shumtë edhe nga familja. Vajza e saj, Marina Fara, i dedikoi së fundmi një mesazh publik, duke i shkruar: “Mbaje kokën lart, mbretëreshë, dhe kurorën drejt. Mbretëresha ime e bukur”.

Tashmë, këngëtarja ka zgjedhur t’i rikthehet asaj që e ka shoqëruar gjatë gjithë karrierës së saj, muzikës. Pa u tërhequr nga jeta publike dhe pa ndërprerë punën, Eli Fara do të ngjitet sërish në skenë përballë publikut të Tiranës.