Diabeti i tipit 2: vlerësim pozitiv për kombinimin e parë javor të insulinës me semaglutidin

Dy barna në një formulë të vetme, që administrohet një herë në javë. Kjo është alternativa e re terapeutike që synon të ndryshojë mënyrën e trajtimit të diabetit të tipit 2.

Kombinimi i parë i insulinës bazale icodec me semaglutidin, të dyja me administrim javor, ka marrë opinion pozitiv nga Komiteti për Barnat për Përdorim Njerëzor, CHMP, i Agjencisë Europiane të Barnave, EMA, për autorizimin e hedhjes në treg. Kjo e afron trajtimin me mundësinë e hyrjes në tregjet farmaceutike europiane.

Formula e re bashkon dy barna me mekanizma veprimi që plotësojnë njëri-tjetrin. Ajo është zhvilluar për të ndihmuar kontrollin e sheqerit në gjak dhe për ta bërë trajtimin më pak të ndërlikuar. Studimet klinike kanë vlerësuar gjithashtu ndikimin e saj në peshën trupore dhe në rrezikun e hipoglicemisë, pra të uljes së tepërt të sheqerit në gjak.

Një qasje e re në trajtimin e sëmundjes

Në Itali, më shumë se 4 milionë të rritur jetojnë me diabet dhe mbi 90% e tyre kanë diabet të tipit 2. Insulina mbetet një nga shtyllat e trajtimit të kësaj sëmundjeje. Megjithatë, rreth 26% e personave me diabet të tipit 2 që kanë nevojë për insulinë e vonojnë fillimin e trajtimit për më shumë se dy vjet, me pasoja të mundshme për zhvillimin e komplikacioneve.

Studimet tregojnë se, edhe pasi fillojnë trajtimin me insulinë, shumë persona me diabet të tipit 2 nuk arrijnë ta mbajnë sheqerin në gjak nën kontrollin e nevojshëm.

Vonesa në nisjen ose përshtatjen e trajtimit kur kjo nevojitet, e njohur si inercia terapeutike, mbetet kështu një nga pengesat kryesore në menaxhimin e kësaj sëmundjeje kronike. Fillimi i insulinës shpesh shtyhet dhe, edhe pasi ajo përfshihet në trajtim, intensifikimi i terapisë ndesh vështirësi të tjera.

Arsyet përfshijnë frikën nga hipoglicemia, numrin e lartë të injeksioneve, skemat e ndërlikuara të trajtimit, barrën praktike e psikologjike që sjell terapia, si edhe rrezikun e shtimit në peshë. Si pasojë, objektivat e trajtimit arrihen me vonesë dhe rezultatet shëndetësore ndikohen negativisht.

«Sot, menaxhimi i diabetit të tipit 2 nuk mund të vlerësohet vetëm nga arritja e vlerave të synuara të sheqerit në gjak», shpjegon Francesco Giorgino, profesor i Endokrinologjisë në Universitetin “Aldo Moro” të Barit.

«Mosha gjithnjë e më e madhe e pacientëve dhe prania e shpeshtë e sëmundjeve shoqëruese të zemrës, veshkave e mëlçisë, si edhe e problemeve me peshën, kërkojnë një qasje të gjithanshme, të përqendruar te rezultatet e trajtimit dhe te përditshmëria e personit. Në këtë kuadër, kombinimi i ri ka rëndësi sepse bashkon në një formulë të vetme javore mekanizma veprimi që plotësojnë njëri-tjetrin, me synimin për të ndihmuar kontrollin e sheqerit në gjak dhe për të thjeshtuar trajtimin.»

52 injeksione në vit, kundrejt mbi 1.000 të skemës krahasuese

Në programin e zhvillimit klinik COMBINE, bari i ri i Novo Nordisk u vlerësua si një mundësi për intensifikimin e trajtimit me insulinë përmes një injeksioni të vetëm në javë. Kjo përkthehet në 52 injeksione në vit, kundrejt mbi 1.000 injeksioneve të skemës me disa administrime në ditë me të cilën u krahasua.

Në studime u përfshinë persona me diabet të tipit 2, tek të cilët sheqeri në gjak nuk kontrollohej mjaftueshëm me insulinë bazale, barna që veprojnë mbi receptorin GLP-1 ose barna kundër diabetit që merren nga goja.

Në të katër studimet klinike, trajtimi arriti objektivin kryesor lidhur me kontrollin e sheqerit në gjak. U vërejtën gjithashtu rezultate për peshën trupore dhe shpeshtësinë e episodeve të hipoglicemisë, në krahasim me skemën me shumë injeksione.

Një trajtim më i thjeshtë mund ta ndihmojë specialistin ta nisë ose ta intensifikojë terapinë, si edhe t’ua lehtësojë pacientëve ndjekjen e rregullt të saj.

«Kjo alternativë e re është pjesë e zhvillimeve në trajtimin e diabetit të tipit 2. Arritja e vlerave të synuara të sheqerit në gjak mbetet thelbësore, por vlerësimi i trajtimit duhet të marrë parasysh edhe gjendjen e përgjithshme shëndetësore të personit, praninë e shpeshtë të sëmundjeve shoqëruese të zemrës, veshkave e mëlçisë, peshën trupore dhe ndikimin e terapisë në jetën e përditshme», shton diabetologu.

«Në këtë kontekst, bashkimi i insulinës bazale dhe i një agonisti të receptorit GLP-1 në një formulë të vetme javore përbën një alternativë me interes. Ai ndërthur mekanizma veprimi plotësues dhe mund të ndihmojë në uljen e disa pengesave për nisjen dhe intensifikimin e trajtimit, përfshirë numrin e administrimeve dhe ndërlikimin e skemave terapeutike.»

Sipas tij, pakësimi i injeksioneve mund t’i ndihmojë pacientët ta ndjekin më rregullisht trajtimin dhe të përmirësojë cilësinë e jetës.

«Risitë në trajtimin e diabetit duhen vlerësuar duke marrë parasysh, krahas efektivitetit dhe sigurisë, edhe thjeshtësinë e trajtimit, përshtatshmërinë e tij për gjendjen klinike dhe vendosjen e personit në qendër të kujdesit.»

Italia mund të jetë e para në Europë që e ofron

Pasi u bë vendi i parë në botë që vuri në dispozicion insulinën javore, Italia mund të jetë tashmë vendi i parë në Europë që u ofron personave me diabet të tipit 2 këtë formulë të re.

Megjithatë, përpara se pacientët të kenë akses në të, duhet pritur vlerësimi i Agjencisë Italiane të Barnave, AIFA. Kjo agjenci do të përcaktojë edhe çmimin dhe mundësinë e rimbursimit.

«Në këtë kuadër, Italia mund të luajë sërish një rol të rëndësishëm për të mundësuar akses në kohë dhe të përshtatshëm në një risi të destinuar për personat me diabet të tipit 2, duke respektuar vlerësimet e autoriteteve përkatëse dhe qëndrueshmërinë e sistemit shëndetësor», përfundon profesor Giorgino.

«Shpresojmë që autoritetet shëndetësore të vendit tonë ta shqyrtojnë me kujdes këtë formulë të re terapeutike, për t’u dhënë një përgjigje konkrete nevojave ende të paplotësuara të personave me diabet të tipit 2.»