Ben Blushi sjell romanin e ri “Historitë e çmendura të Tiranës”: Tirana është djegur disa herë

Ben Blushi ka njoftuar botimin e romanit të tij më të ri, “Historitë e çmendura të Tiranës”, një vepër që e shtrin rrëfimin e kryeqytetit shqiptar në katër shekuj, nga viti 1600 deri në vitin 2000.

Autori bëri të ditur se libri ka shkuar në shtyp te “Onufri” dhe do të gjendet në librari duke nisur nga data 3 nëntor.

Sipas Blushit, romani lindi nga një ndjenjë keqardhjeje për qytetin ku është lindur dhe nga bindja se Tirana nuk ka marrë në letër vëmendjen që meriton.

“Ky roman u shkrua nga keqardhja për qytetin ku kam lindur. Për Tiranën ka më pak libra se për çdo kryeqytet tjetër europian”, shkruan ai.

“Historitë e çmendura të Tiranës” sjell luftërat, pushtimet, ndërtimet dhe intrigat që, sipas autorit, kanë formësuar qytetin ndër shekuj. Në qendër të rrëfimit janë qindra pashallarë, bejlerë, aventurierë, ushtarakë, shkrimtarë, poetë, mbretër dhe perandorë, të cilët kanë luftuar për ta kontrolluar apo ndryshuar Tiranën.

Përmes historive të shtrira në 400 vjet, Blushi synon të tregojë edhe aftësinë e qytetit për të mbijetuar dhe për t’u ringritur pas çdo shkatërrimi.

“Kushdo që do ta lexojë këtë histori të shtrirë në 400 vjet, do të kuptojë se Tirana është djegur disa herë, siç po ndodh edhe sot, dhe gjithmonë është ringritur më e bukur dhe më vitale”, shprehet autori.

Blushi e cilëson një “koincidencë fatale” faktin që libri po botohet pikërisht në një periudhë kur, sipas tij, Tirana po vuan, duke theksuar se koha e publikimit nuk ishte planifikuar në raport me zhvillimet e ditëve të fundit.

“Historitë e çmendura të Tiranës” pritet të dalë në të gjitha libraritë më 3 nëntor, duke sjellë një portret të kryeqytetit jo vetëm si hapësirë gjeografike, por si një qytet të ndërtuar, djegur, pushtuar dhe rindërtuar vazhdimisht nga njerëzit dhe historitë e tij.