Ben Affleck kujton prindërit që i humbi brenda dy muajsh: “I merrja si të mirëqena sakrificat e nënës sime”

Aktori dhe vëllai i tij, Casey, humbën të dy prindërit këtë vit, vetëm dy muaj larg njëri-tjetrit. Pas divorcit, ishte kryesisht nëna e tyre, Chris, ajo që u kujdes për ta. Babai, Tim, u zhvendos në Kaliforni dhe, pasi u përball me problemet me alkoolin, arriti ndër vite të rindërtonte marrëdhënien me të bijtë.

Ben Affleck ka humbur të dy prindërit brenda vetëm dy muajsh. Fillimisht babanë, Tim, i cili ndërroi jetë në prill, për një shkak që nuk është bërë publik. Më pas nënën, Chris, e cila u nda nga jeta më 2 qershor, në moshën 83 vjeç, nga kanceri i pankreasit. Vetëm dy ditë më parë, ajo kishte parë të nipin të diplomohej.

“Prindërit e mi sapo kanë ndërruar jetë. Të dy. Në prill dhe në qershor”, rrëfeu aktori në podcastin Street You Grew Up On të Kerry Washington. “Është një humbje shumë e madhe, që më ka bërë të reflektoj mbi fëmijërinë time.”

Affleck, 54 vjeç, u rrit në Cambridge të Massachusetts, së bashku me vëllanë e tij më të vogël, Casey. Kur prindërit u divorcuan, ai ishte 11 vjeç. Pas ndarjes, ishte kryesisht Chris ajo që mori përsipër kujdesin për dy djemtë. Tim u zhvendos në Kaliforni dhe, pasi u përball me problemet e tij me alkoolin, me kalimin e viteve arriti të rindërtonte lidhjen me Ben dhe Casey. Por nëna mbeti gjithmonë mbështetja e tyre e palëkundur.

“Pa dyshim, kam mësuar ta vlerësoj edhe më thellë nënën time”, tregoi ai. “T’i jap vërtet vlerë gjithçkaje që ka bërë, të shoh sakrificat dhe përkushtimin e saj, të kuptoj se sa plotësisht i ishte kushtuar gjithë kësaj.”

Aktori është prekur veçanërisht nga disa letra që Chris u kishte shkruar prindërve të saj shumë vite përpara se të bëhej bashkëshorte dhe nënë. Duke i lexuar pas vdekjes së saj, ai pati mundësinë të njihte një anë të së ëmës që deri atëherë i kishte mbetur e panjohur: gruan e re me ambicie, dyshime dhe plane, shumë kohë përpara se të lindnin fëmijët e saj.

“Ishte vërtet e çuditshme për mua t’i lexoja ato letra”, shpjegoi Affleck. “Së pari, sepse aty ishte kjo grua e re, plot jetë, ambicie dhe ëndrra, që ende nuk e dinte çfarë do të bënte: ‘Ndoshta mund të bëhem punonjëse sociale, ndoshta mësuese, po zhvillohen këto protesta…’. Por ajo që më bëri më shumë përshtypje ishte se kjo grua kishte pasur për plot 30 vjet jetën e saj, një jetë që nuk kishte pasur asnjë lidhje me mua.”

Chris punonte si mësuese.

“Ishte mësuese dhe punonte vërtet shumë. Jep­te mësim në një shkollë fillore publike”, kujtoi ai. “Mësimin e mbaronte në orën 14:30, por nuk kthehej kurrë në shtëpi përpara orës 17:30 apo 18:00. Pastaj vinte në shtëpi dhe bënte gjithçka, e kupton? Ndërsa unë isha aty, me shumë gjasë duke i hapur gjithë ato telashe.”

Sot, si i rritur dhe baba i tre fëmijëve, Ben Affleck i sheh ndryshe ato kujtime. Nga martesa me Jennifer Garner, ai ka Violet, 20 vjeçe, Fin, 17 vjeç, dhe Samuel, 14 vjeç. Përvoja e tij si prind e ka ndihmuar ta kuptojë më mirë atë që dikur i dukej thjesht pjesë e zakonshme e jetës.

“Për herë të parë, më preku vërtet fakti që gjithçka që ajo bënte, unë e kisha marrë si të mirëqenë”, tha aktori. “Ndoshta pikërisht ashtu siç ajo donte që unë ta merrja si të mirëqenë. Ashtu siç dua edhe unë që fëmijët e mi ta shohin si diçka të vetëkuptueshme atë që bëj për ta.”