Ben Affleck: “Hipokrizia, korrupsioni dhe dështimet më kanë zhgënjyer nga politika”

Ben Affleck nuk ka ndërmend të kandidojë për ndonjë post publik. Aktori 54 vjeçar thotë se politika i duket sot një botë “shumë dëshpëruese” dhe se vitet e fundit është zhgënjyer nga sistemi, nga politikanët dhe nga mënyra se si funksionon gjithçka. 

Ylli i Batman v Superman: Dawn of Justice foli për këtë temë gjatë promovimit të filmit të tij të ri Animals, ku interpreton një kandidat për kryetar bashkie të Los Angelesit.

Kur u pyet nga Variety nëse mund ta imagjinonte veten në politikë edhe në jetën reale, Affleck e hodhi poshtë menjëherë idenë.

“Më duket diçka e tmerrshme. E shëmtuar”, tha ai. “Ka një arsye pse historitë politike përdoren kaq shpesh si metafora për kompromisin moral. Aty përballesh drejtpërdrejt me kontrastin mes versionit ideal të asaj që duhet të jemi dhe mënyrës se si gjërat funksionojnë në të vërtetë.”

Për aktorin, politika është “një botë shumë dëshpëruese” dhe aspak tërheqëse.

Ai refuzoi gjithashtu të tregonte se kë mbështet në zgjedhjet për kryetar bashkie të Los Angelesit këtë nëntor.

“Nuk e kisha menduar se do të më bëhej kjo pyetje. Nuk e di nëse, për shkak të këtij filmi, mbështetja ime do ta ndihmonte apo do ta dëmtonte dikë”, tha ai. “Mendoj se duhet të qëndroj neutral, të paktën deri sa të dalë filmi.”

“Sistemi po na dështon”
Në një intervistë për Good Morning America, Affleck tha se standardi që publiku pret nga politika ka rënë aq shumë, sa njerëzit tashmë kërkojnë thjesht dikë që t’u flasë hapur.

Sipas tij, kjo ndjesi nuk kufizohet vetëm në një krah politik.

“Qoftë demokrat apo republikan, ekziston një ndjesi në vend se nuk po bëjmë një punë shumë të mirë. Kemi një sistem që, në njëfarë mënyre, po na dështon”, tha ai.

Roli i një kandidati për kryetar bashkie në Animals i dha, sipas Affleck, edhe një ide më konkrete se çfarë do të thotë një karrierë e tillë.

“Kuptova se kjo nuk është aspak argëtuese. Është një mënyrë shumë e vështirë për të jetuar, sepse në thelb je gjithë kohën duke mbledhur para.”

Gjatë xhirimeve, Affleck dhe aktori që interpreton menaxherin e fushatës së personazhit të tij vendosën madje të bënin një eksperiment.

Veshën bluza dhe kapele elektorale me emrin e personazhit dhe dolën nëpër Los Angeles duke u shtirur sikur Affleck po kandidonte vërtet për kryetar bashkie.

Njerëzit i kërkonin fotografi, interesoheshin dhe nisnin t’i tregonin shqetësimet e tyre.

“Në një moment mendova: nëse nuk bëj kujdes, do t’i fitoj këto zgjedhje”, tregoi ai me humor.

Më pas iu drejtua kamerës: “Mos më votoni për kryetar bashkie!”

“Jam zhgënjyer nga sistemi, politika dhe politikanët”
Në një intervistë tjetër, Affleck e quajti mbajtjen e një posti publik “një punë të tmerrshme” dhe tha se sot ndihet thellësisht i zhgënjyer.

“Jam shumë i zhgënjyer nga sistemi, nga politika, nga politikanët dhe nga mënyra se si funksionon e gjithë kjo”, tha ai.

Kur dikush i tha se spoti elektoral që kishte realizuar për filmin ishte bindës, aktori u përgjigj me ironi:

“Do të ndihesha i komplimentuar, po të mos ishte fakti që standardi në politikë sot është kaq i ulët.”

Animals dhe kompromiset morale
Affleck shpjegoi se edhe filmi i tij i ri merret pikërisht me pyetjen se deri ku mund të shkojë një njeri kur ka diçka për të humbur.

Sipas tij, njerëzit janë më të prirur të bëjnë kompromise morale pikërisht kur rrezikojnë diçka personale.

“A jemi thjesht kafshë që kërkojmë interesin tonë dhe më pas ndërtojmë histori për të justifikuar atë që kemi bërë dhe vendin ku kemi përfunduar?”, pyet ai.

“Pastaj ekziston edhe një pjesë tjetër e jona, versioni ynë më i mirë, që thotë: ‘Do t’i qëndroj besnik këtij kodi moral, edhe nëse kjo më kushton diçka’.”

Nga angazhimi politik te zhgënjimi
Ben Affleck ka qenë politikisht aktiv në të kaluarën. Ai ka marrë pjesë në fushata dhe ka mbështetur kandidatë demokratë, nga ish zëvendëspresidenti Al Gore te Barack Obama.

Por sot thotë se e sheh shumë ndryshe botën politike.

Sipas tij, ajo që e ka larguar janë “hipokrizia, korrupsioni dhe dështimi”.

“Mënyra se si është ndërtuar sistemi sot sillet kaq shumë rreth parave, deklaratave të shkurtra për efekt mediatik, mizorisë, kapjes së tjetrit në gabim dhe batutave thumbuese që në të vërtetë nuk kanë pothuajse asnjë lidhje me jetën e njerëzve”, tha Affleck.

Aktori mendon gjithashtu se është bërë gjithnjë e më e lehtë të fitosh vota duke iu drejtuar anës më të keqe të njerëzve sesa asaj më të mirë.

“Nëse po tregon një histori për moralin dhe kompromisin, ka pafund presione që të kërkojnë vazhdimisht të sakrifikosh parimet e tua.”

Për Affleck, pikërisht kjo është arsyeja pse politika mund të jetë material i fuqishëm për kinemanë, por jo domosdoshmërisht një botë ku ai vetë do të dëshironte të hynte.