6 arsye për të ngrënë fara luledielli rregullisht

Farat e lulediellit janë një nga ato ushqime të vogla që shpesh i përdorim thjesht për t’i dhënë më shumë teksturë një sallate, një bowl-i apo një snack-u. Por ushqyeshmërisht kanë shumë më tepër për të ofruar.

Ato janë burim i mirë i proteinave bimore, fibrave, yndyrnave të pangopura, vitaminës E, magnezit dhe selenit. Sipas dietologes Archana Batra, kombinimi i këtyre lëndëve ushqyese mund të mbështesë disa funksione të rëndësishme të organizmit, nga zemra dhe imuniteti te mbrojtja antioksiduese.

Një porcion prej rreth 30 gramësh, afërsisht sa një grusht i vogël, përmban rreth 5 gramë proteina, 3 gramë fibra, si edhe vitaminë E, magnez dhe yndyrna të pangopura.

Mbështesin shëndetin e zemrës
Farat e lulediellit përmbajnë kryesisht yndyrna të pangopura.

Kur këto zëvendësojnë në dietë ushqime më të pasura me yndyrna të ngopura, mund të kontribuojnë në një profil më të mirë të kolesterolit dhe në shëndetin kardiovaskular.

Pra, përfitimi nuk vjen thjesht nga “shtimi” i farave në dietë, por edhe nga ajo që ato zëvendësojnë.

Janë burim antioksidantësh
Vitamina E dhe seleni janë dy nga lëndët ushqyese më interesante që gjenden në farat e lulediellit.

Ato ndihmojnë në mbrojtjen e qelizave nga stresi oksidativ, pra dëmtimi i lidhur me radikalet e lira.

Farat përmbajnë gjithashtu magnez, yndyrna të pangopura dhe përbërës të tjerë me rol antioksidues, ndaj mund të jenë pjesë e një diete të pasur me ushqime që mbështesin mbrojtjen qelizore.

Mbështesin funksionimin normal të sistemit imunitar
Zinku, vitamina E dhe seleni luajnë role të rëndësishme në funksionimin normal të sistemit imunitar.

Farat e lulediellit nuk janë një “booster imuniteti” në kuptimin magjik të termit, por janë një mënyrë e mirë për të shtuar këto mikronutriente në një dietë të larmishme.

Ndihmojnë funksionin e muskujve dhe nervave
Magnezi merr pjesë në shumë procese të organizmit, përfshirë funksionimin normal të muskujve dhe sistemit nervor.

Duke qenë se farat e lulediellit janë një burim i mirë i këtij minerali, ato mund të kontribuojnë në marrjen ditore të magnezit, sidomos kur konsumohen si pjesë e një ushqyerjeje të balancuar.

Mund të ndihmojnë me ngopjen dhe energjinë
Farat e lulediellit nuk janë një “energy shot” i menjëhershëm, por kombinimi i yndyrnave të mira, proteinave dhe fibrave i bën një ushqim relativisht të ngopshëm.

Magnezi gjithashtu është i përfshirë në metabolizmin e energjisë, pra në proceset që i lejojnë trupit ta shndërrojë ushqimin në energji të përdorshme.

Pikërisht për këtë arsye, një sasi e vogël mund të funksionojë mirë si pjesë e një vakti ose snack-u.

Mund të ndihmojnë në mbrojtjen ndaj stresit oksidativ
Ky përfitim lidhet sërish me vitaminën E dhe selenin.

Këto antioksidantë ndihmojnë në neutralizimin e radikaleve të lira dhe në mbrojtjen e strukturave qelizore nga dëmtimi oksidativ.

Kjo nuk do të thotë se farat e lulediellit “detoksifikojnë” trupin apo parandalojnë sëmundjet më vete, por janë një nga shumë ushqimet që mund të kontribuojnë në një dietë të pasur me antioksidantë.

Të gjalla apo të pjekura?

Të dyja mund të jenë zgjedhje të mira.

Nuk është e nevojshme t’i hani vetëm të gjalla për të marrë përfitimet ushqyese.

Farat e pjekura lehtë, pa shumë kripë dhe pa sasi të panevojshme vaji të shtuar, mbeten një alternativë e mirë.

Ajo që duhet parë më shumë është etiketa: versionet shumë të kripura apo të aromatizuara mund të përmbajnë më shumë natrium dhe përbërës të shtuar nga sa mendoni.

Po vaji i lulediellit?

Vaji i lulediellit është i pasur me yndyrna të pangopura dhe vitaminë E.

Kur përdoret në vend të yndyrnave më të pasura me yndyrna të ngopura, mund të jetë pjesë e një diete të shëndetshme për zemrën.

Versionet high-oleic janë më të qëndrueshme ndaj temperaturave të larta dhe funksionojnë mirë edhe në gatim.

Megjithatë, kjo nuk do të thotë se është domosdoshmërisht “më i mirë” se vaji i ullirit apo i avocados. Çdo vaj ka profilin dhe përdorimin e vet.

Sa fara luledielli mund të hamë?

Rreth 30 gramë është një porcion i arsyeshëm për shumicën e njerëzve.

Duhet mbajtur parasysh se, edhe pse shumë ushqyese, farat janë edhe energjikisht të dendura. Pra, një sasi e vogël përmban relativisht shumë kalori.

Mund t’i shtoni në kos, sallata, oats, smoothie bowls, bukë integrale ose t’i konsumoni si snack.

Ideja nuk është t’i shndërroni në “superushqimin” e radhës.

Janë thjesht një ushqim i vogël, praktik dhe shumë ushqyes që mund të ketë vend të rregullt në një dietë të balancuar.