5 arsye pse duhet të ecni pas ngrënies

Pas një vakti të bollshëm, aktiviteti fizik është ndoshta gjëja e fundit që ju shkon në mendje. Megjithatë, një shëtitje e qetë pas ngrënies mund të sjellë disa përfitime për shëndetin, përtej përmirësimit të humorit dhe uljes së stresit. Është një zakon i thjeshtë që mund të bëhet lehtësisht pjesë e përditshmërisë.

Dr. Heather Viola, mjeke e kujdesit parësor pranë Mount Sinai Doctors-Ansonia, shpjegon për British Vogue pse mund të jetë e dobishme të bëni disa hapa pas mëngjesit, drekës ose darkës.

Sipas saj, ecja pas vakteve ka pesë përfitime kryesore: ndihmon tretjen, mbështet shëndetin e zemrës, ndihmon në kontrollin e sheqerit në gjak, kontribuon në ruajtjen e një peshe të shëndetshme dhe mund të përmirësojë gjumin.

1. Ndihmon tretjen

Fryrja, kapsllëku, refluksi dhe shqetësimet në stomak mund ta bëjnë të pakëndshme periudhën pas një vakti. Një shëtitje e shkurtër mund të ndihmojë në lehtësimin e disa prej këtyre shqetësimeve.

“Ecja pas ngrënies stimulon stomakun dhe zorrët, duke ndihmuar lëvizjen e ushqimit nëpër aparatin tretës dhe duke lehtësuar tretjen”, shpjegon dr. Viola.

2. Mbështet shëndetin e zemrës

Studimet kanë treguar prej kohësh se aktiviteti fizik i rregullt i bën mirë zemrës. Ai mund të ndihmojë në uljen e tensionit arterial dhe kolesterolit, si edhe të zvogëlojë rrezikun e infarktit, goditjes në tru dhe problemeve të tjera kardiovaskulare.

Edhe periudhat e shkurtra të aktivitetit gjatë ditës kanë vlerë. Një shëtitje prej 10–15 minutash pas vakteve është një mënyrë praktike për ta përfshirë lëvizjen në rutinë dhe për të mbështetur shëndetin e zemrës.

3. Ndihmon në kontrollin e sheqerit në gjak

Sipas dr. Viola-s, qëndrimi pa lëvizur pas ngrënies mund të favorizojë rritje më të theksuara të nivelit të sheqerit në gjak.

Mëlçia dhe muskujt ruajnë një pjesë të glukozës, ndërsa insulina ndihmon organizmin ta përdorë ose ta depozitojë atë. Çrregullimet e vazhdueshme në këtë proces lidhen me rezistencën ndaj insulinës dhe me rritjen e rrezikut për prediabet e diabet të tipit 2.

Studimet e përmendura në artikull tregojnë se ecja pas ngrënies mund të ndihmojë në zbutjen e rritjes së glukozës pas vaktit dhe në kontrollin më të mirë të saj.

4. Kontribuon në ruajtjen e një peshe të shëndetshme

Sipas mjekes, ecja pas vakteve mund të ndihmojë edhe në ruajtjen e një peshe të shëndetshme. Ajo është një mënyrë e thjeshtë për të shtuar aktivitetin fizik gjatë ditës dhe për ta bërë lëvizjen një zakon të rregullt.

5. Mund të përmirësojë gjumin

Dr. Viola shpjegon se ecja pas darkës mund të ndihmojë në rregullimin e ritmit cirkadian, orës së brendshme 24-orëshe të trupit që ndikon te gjumi, zgjimi dhe mirëqenia fizike e mendore.

Sipas saj, ky zakon mund të mbështesë ciklin natyror gjumë–zgjim, duke e bërë më të lehtë rënien në gjumë dhe duke ndihmuar një pushim më të mirë.

Për më tepër, nëse shëtitja lehtëson shqetësimet e stomakut pas darkës, mund të ndihmojë që gjumi të jetë më i rehatshëm dhe të ndërpritet më rrallë gjatë natës.

Sa kohë pas ngrënies duhet të ecni?

Sipas dr. Viola-s, nuk ka një interval të vetëm që duhet ta respektojnë të gjithë. Mund të dilni për një shëtitje të lehtë edhe menjëherë pas ngrënies; disa studime sugjerojnë se lëvizja e hershme pas vaktit mund të sjellë më shumë përfitime.

Megjithatë, disa njerëz mund të ndiejnë parehati në stomak nëse lëvizin sapo kanë përfunduar së ngrëni. Në këtë rast, mund të prisni rreth 15 minuta përpara se të niseni.

“Në fund, gjithçka varet nga mënyra se si ndiheni ju”, thotë mjekja.

Sa duhet të zgjasë shëtitja?

Kjo varet kryesisht nga qëllimi juaj. Nëse dëshironi të ndihmoni tretjen, sipas dr. Viola-s, edhe një shëtitje 10-minutëshe në lagje pas çdo vakti mund të jetë e dobishme.

Nëse synoni të rrisni aktivitetin e përgjithshëm fizik ose të arrini një objektiv të caktuar hapash, mund ta zgjasni ecjen në 30 minuta apo më shumë, sipas mundësive tuaja.

A vlen edhe ecja brenda shtëpisë?

Po. Çdo formë lëvizjeje ka rëndësi. Edhe ecja nga një dhomë në tjetrën apo përdorimi i shkallëve janë mënyra për të shtuar aktivitetin gjatë ditës.

Një mundësi tjetër janë pajisjet kompakte të ecjes, të njohura si walking pads. Ato funksionojnë si pista të vogla ecjeje dhe shumë modele palosen ose vendosen lehtësisht poshtë mobilieve.

Holly Haywood, instruktore drejtuese në Third Space Soho, është shprehur më herët për British Vogue:

“Besoj se ia vlen çdo gjë që të nxit të lëvizësh. Qoftë një pajisje kompakte ecjeje, një pistë palestre apo një shëtitje jashtë. Lëvizja mbetet lëvizje. Pistat e palestrës mund të ofrojnë pjerrësi dhe më shumë mundësi shpejtësie, ndërsa pajisjet kompakte mund të jenë shumë praktike për njerëzit me orare të ngarkuara, sepse u lejojnë të ecin ndërkohë që merren me punët e tyre, pa dalë nga shtëpia.”

Mos e teproni me intensitetin

Edhe pse ecja e lehtë pas ngrënies mund të jetë e dobishme, dr. Viola këshillon të shmanget aktiviteti intensiv menjëherë pas një vakti, sepse mund të shkaktojë shqetësime të tretjes.

“Gjatë vrapimit, muskujt që punojnë kanë nevojë për më shumë qarkullim gjaku, që t’u sigurohen oksigjeni dhe energjia e nevojshme”, shpjegon ajo. “Kjo mund të pakësojë qarkullimin e gjakut drejt aparatit tretës. Të ngrënit pak përpara një aktiviteti më intensiv mund ta ngarkojë tretjen dhe të shkaktojë ngërçe ose parehati kur fillon ushtrimi.”

Pas vaktit, zgjidhni një ritëm të qetë dhe përshtateni ecjen me mënyrën se si ndihet trupi juaj.