Pavarësisht imazhit të tyre të shkëlqyer si një nga familjet më të dashura në Britani, duket se në shtëpinë e Beckham-ve nuk është gjithmonë gjithçka rozë. Sipas burimeve për TMZ, djemtë e David dhe Victoria Beckham, Brooklyn dhe Romeo, janë aktualisht në një konflikt serioz dhe nuk flasin me njëri-tjetrin.
Shkaku i zënkës? Kim Turnbull, e dashura e re e Romeos, për të cilën thuhet se ka pasur një lidhje të shkurtër më parë me Brooklyn. Edhe pse burimet theksojnë se nuk bëhet fjalë për xhelozi klasike vëllazërore, tensioni vjen nga dyshimet rreth qëllimeve të Turnbull – a po “sillet” ajo mes vëllezërve Beckham për famë?
Turnbull, një DJ 23-vjeçare me bazë në Londër, ishte pjesë e festës luksoze për ditëlindjen e 50-të të David Beckham në Miami fundjavën që lamë pas. Të pranishëm ishin shumica e anëtarëve të familjes – përveç Brooklyn dhe bashkëshortes së tij, Nicola Peltz Beckham.
Dhe mungesa e tyre, sipas burimeve të afërta me çiftin, nuk ishte aspak rastësore: Brooklyn nuk dëshiron të marrë pjesë në asnjë event publik ku ndodhet Turnbull. Kjo përplasje thuhet se është edhe arsyeja pse çifti e kaloi me heshtje sfilatën e Victorias në mars.
Romeo nga ana tjetër duket se ka vendosur një qëndrim të qartë. Në një postim në Instagram Story, ai ndau një foto nga festa e babait ku përfshiu Kim Turnbull, motrën Harper, prindërit Victoria dhe David, vëllain Cruz dhe të dashurën e tij, Jackie Apostel. Brooklyn ishte i vetmi që mungonte në këtë “album familjar”. Postimi shoqërohej me mbishkrimin: “Familja është gjithçka… ju dua të gjithëve.”
Deri më tani, as Brooklyn dhe as familja Beckham nuk kanë dhënë një koment zyrtar.
Romeo bëri lidhjen me Kim Turnbull zyrtare në Instagram në nëntor 2024, ndërkohë që vetëm një muaj më parë ishte fotografuar në përqafime me modelen Gray Sorrenti. Më parë, ai kishte një lidhje 5-vjeçare me Mia Regan, e cila përfundoi në shkurt të 2024-s.
