Në një kohë kur temat që prekin industrinë e muzikës janë gjithmonë në qendër të vëmendjes, një deklaratë e Soni Malaj në emisionin e Meriton Mjekiqit ka shkaktuar debat në mediat sociale. Ajo foli për sfidat që hasin këngëtarët shqiptarë kur bëhet fjalë për performancat live, duke theksuar se numri i këngëtarëve që performojnë live është dukshëm më i vogël se ata që preferojnë playback.
“Kur vjen fjala për të bërë një koncert live, në të gjithë industrinë jemi tre veta. Nëse në Shqipëri do bëhen evente të mëdha dhe duhet të dalim në sheshin Skënderbej para 20 mijë vetave live, jam vetëm unë, Aurela Gaçe, Alban Skënderaj. Çdo gjë minimizohet, nga qindra këngëtarë që janë, bie numri.
Edhe kur duam të këndojmë live, nuk është teknika e duhur. Audienca e kupton shumë mirë këtë. Ndoshta edhe këngëtarët duan të dalin live, por nuk janë kushtet, sepse gjithçka është shumë e shpejtë.”
Fjalët e saj u interpretuan si një kritikë ndaj kolegëve të saj, gjë që e detyroi atë të reagojë në Instagram për të sqaruar situatën.
Në postimin e saj në Instagram, Soni shprehu shqetësimin e saj për keqkuptimet që kishin lindur pas deklaratës së saj dhe theksoi se ajo vlerëson shumë kolegët e saj që performojnë live.
“Po shoh lajme dhe statuse ku një fjali e imja, e thënë shumë shpejt, është përkthyer si një mosvlerësim ndaj kolegëve të mi.
Dua t’ju bëj të qartë që unë i vlerësoj të gjithë miqtë, kolegët dhe bashkëpunëtorët që performojnë live.
Konteksti i asaj që thashë është që, fatkeqësisht, numri i këngëtarëve që këndojnë live është më i vogël se ai i atyre që këndojnë playback.
Duhej që atë fjali ta shpjegoja pak më gjatë për të shmangur keqkuptimet,” shkroi ajo.
