Ka momente në jetë kur e shkuara të rikthen pas në kohë. Për Bebe Rexhën, një nga yjet më të njohr të pop-it , ky moment nostalgjik erdhi mes festimeve të Bajramit në shtëpinë e prindërve të saj në New York.
Ajo publikoi disa fotografi të kësaj dite të veçantë në Instagram, por ajo që pushtoi vërtet zemrat e ndjekësve ishte një copëz nga fëmijëria, një ese e shkruar kur ishte vetëm nëntë vjeçe.
Një faqe letre e mbushur me fjalët e një vogëlusheje të quajtur Bleta Rexha, e cila kishte një listë të gjatë pasionesh: sporte, këngë operistike dhe pop, vizatim, pikturë, libra dhe lojëra me letra. Një fëmijë që e donte dimrin, por nuk ishte shumë e dhënë pas Halloween-it, nga frika e karameleve të tepërta. Një vajzë e vogël, që në rrëmujën e botës së saj naive dhe ëndërrimtare, tashmë kishte mbjellë farat e një të ardhmeje të jashtëzakonshme.
Në esenë e saj shkruhet: “Emri im është Bleta Rexha. Jam nëntë vjeçe. Më pëlqejnë sportet. Sportet që më pëlqejnë janë hokej, bejsboll, basketboll, patinazh, futboll, volejboll, gjimnastikë. Më pëlqen të këndoj opera dhe këngë pop. Hobet e mia janë këndimi, pikturimi, vizatimi, leximi dhe luajtja e lojërave me letra. Sezoni im i preferuar është dimri. Më pëlqen Halloween-i, por jo shumë, sepse nëse ha shumë karamele, ndihesh keq. Ushqimet e mia të preferuara janë pizza, tacos, pure patatesh, patate të skuqura, copëza pule, makarona, veçanërisht mishi, orizi, lazanja dhe pierogit. Pija ime e preferuar është uji. Më pëlqen të dëgjoj muzikë nga radioja kudo që të jem! Kaq për mua”.
Dhe ja ku jemi sot. Ajo vogëlushe që pëlqente të këndonte, sot mbush stadiume. Ajo që e dashuronte muzikën nga radioja, sot është vetë zëri që dëgjohet në të gjitha stacionet e botës. Ajo që listonte me përpikmëri hobet dhe ushqimet e preferuara, sot është një grua që ka ndërtuar një karrierë të madhe, pa harruar kurrë rrënjët e saj.
Ky moment është një dëshmi se pasionet e vërteta nuk shuhen kurrë.
