Letrat e tarotit do të të mësojnë se si të ndërtosh një shpirt. Gjithnjë më kanë tërhequr ato gjëra që më zgjonin kureshtjen, që më dukeshin interesante, por që nuk i kuptoja. Tarotët më magjepsnin sepse ishin tepër të çuditshëm. Fillova t’i studioja letër pas letre. Vërejta strukturën e tyre – 22 Arcana (mistere) të mëdha dhe 56 Arcana të vogla. Pashë kategoritë e tyre – shpata, shkopinjtë magjikë, kupat dhe pentagramët. I identifikova dhe vijova me studimin e tyre. Por nuk arrija t’i kuptoja plotësisht letrat e tarotit.

Pastaj fillova t’i përziej. Pashë se si mund të vendoseshin së bashku dhe kuptova se 78 letrat mund të bashkoheshin në një mandala, në një imazh të vetëm. Kur i shikon të gjitha letrat e tarotit njëherësh, e kupton se ato krijojnë një tërësi. Vetëm pasi të kesh analizuar këtë njësi, mund të fillosh të lexosh tarotët.

Nuk duhet të flasësh për të ardhmen. E ardhmja është një mashtrim. Taroti është një gjuhë që flet për të tashmen. Nëse e përdor për të parashikuar të ardhmen, atëherë je vetëm një mashtrues, një sharlatan dhe asgjë më shumë. Për mua, tarotët janë diçka shumë më e thellë. Ata përfaqësojnë një kërkim të thellë psikologjik. Kur punon me tarotët, kupton se ekziston mundësia, ekziston sinkronia, çdo gjë është e lidhur. Asgjë nuk është çështje probabiliteti. Nëse e vë shpirtin tënd në diçka, ai fenomen do të ndodhë. Kur je i vendosur, kur depërton në atë dimension, unë e quaj atë vallëzimin e realitetit – bota vallëzon rreth teje dhe të jep atë që kërkon.

Një ditë më takoi një burrë që nuk fliste dot. Nuk e di sa vjeç ishte. Më tha: "Unë jam pasardhës i familjes Camoin, e cila ka printuar letrat e tarotit për dy shekuj. Kam nevojë për ndihmën tënde për të restauruar tarotin e Marsejës."

Ai kishte letrat e vjetra të këtij taroti, të gdhendura në dru, dhe koleksione të ndryshme tarotësh. Më dha të gjitha materialet e nevojshme dhe ne e restauruam atë tarot. E rikthyem ashtu siç kishte qenë në vitin 1400. Nuk mund të shkonim më tej, sepse nuk kishte të dhëna. Por ai tarot është aq i vjetër sa mund të jetë. Restauruam 11 ngjyrat, simbolet, gjithçka. Çdo element tek letrat e tarotit simbolizon diçka. Ato janë një enciklopedi e madhe simbolesh, një gjuhë e fuqishme optike.

Të gjitha letrat e lojërave që njohim sot e kanë origjinën nga tarotët, përfshirë edhe letrat e pokerit. Por pokeri nuk ka 78 letra, ka 26 më pak. Në Kabala, numri 26 është numri i Zotit. Pokeri është një lojë me letra pa Zotin.

Kudo ku kam shkuar, kam gjetur lloje të ndryshme tarotësh. Kam arritur të mbledh mbi 1,500 karta tarot. Por e dija që ekzistonte një tarot nga i cili kishin rrjedhur të gjitha të tjerët.

"I vetmi sekret, taroti i vërtetë, është taroti i Marsejës", thoshte André Breton. "Unë nuk e kuptoj, por e respektoj atë."

Kështu, fillova të studioj tarotin e Marsejës:

I Çmenduri – liri e plotë, pa kufij, pa përcaktim;

Magjistari – fillimi, zgjedhja e duhur;

Priftëresha – përvoja e grumbulluar;

Perandorja – një shpërthim krijimtarie, por pa drejtim;

Perandori – stabilitet dhe siguri materiale;

Papa – një hap përtej stabilitetit, fillimi i rrugëtimit shpirtëror;

I Dashuruari – aftësia për të bërë zgjedhjen e duhur, lidhja me botën;

Qerrja – veprim dhe sukses në botë;

Drejtësia – të marrësh atë që meriton;

Heremiti – introspeksion, udhëtim i brendshëm për ndriçim shpirtëror;

Rrota e Fatit – fundi i një cikli, kalimi në një dimension tjetër;

Forca – njohja dhe kanalizimi i fuqisë së brendshme;

Njeriu i Varur – tërheqje nga bota për të arritur vetëdije të thellë;

Arkana pa Emër – transformim i madh, rilindje;

Temperanca – shërimi dhe balancimi i energjive;

Djalli – përballja me dëshirat dhe fuqinë e krijimtarisë pa frikë;

Kulla – shkatërrimi i kufizimeve, hapja ndaj të panjohurës;

Ylli – gjetja e vendit tënd dhe veprimi me harmoni;

Hëna – instinkti, poezia, fuqia e nënvetëdijes;

Dielli – fillimi i një jete të re, dashuri dhe ndriçim i plotë;

Gjykimi – bashkimi i të gjitha aspekteve të qenies, zgjuarsia superiore;

Bota – vetëdija e plotë, harmonia mes shpirtit, mendjes dhe trupit.

Ne nisemi nga I Çmenduri, që simbolizon lirinë e pakufizuar, dhe kalojmë nëpër të gjitha Arcana-t, derisa arrijmë tek Bota, që përfaqëson bashkimin e plotë. Fjala "yoga", feja, filozofia, të gjitha lidhen me këtë koncept: bashkimin.

Një organizëm qelizor mbijeton vetëm kur është i lidhur me mjedisin e tij. Nëse ndërpret lidhjet me mjedisin, ai vdes. E njëjta gjë vlen edhe për shpirtin njerëzor. Nëse nuk lidhet me botën dhe njerëzit, ai venitet.

I Çmenduri udhëton në botë për të krijuar lidhje. Kur je i lidhur me gjithçka, nuk ke më armiq.

Burimi: https://www.youtube.com/watch?v=mqnVKr9hf4A