“Në Sanremo më kritikuan për mënyrën time të të qenit e çlirët, dhe kjo është në rregull. Çdokush ka të drejtë të mendojë si dëshiron. Por ka diçka që më ka mërzitur: komentet në internet ku thuhej se dukesha sikur isha e droguar.” Alessia Marcuzzi buzëqesh, por shkon direkt në thelb: e ftuar në 'Domenica In', moderatorja u rikthye te nata finale e Festivalit, në skenën e Aristonit, ku pati debutimin e saj. “Gjatë konferencës për shtyp thashë që nuk ishte ëndrra ime ta bëja,” qesh ajo me Mara Venier.
“Mua më pëlqente shumë ta shikoja nga shtëpia, të organizoja darka me miqtë dhe të luanim së bashku me letrat e vlerësimeve: kënga më e mirë, teksti më i mirë, veshja më e bukur,” tregon sërish ajo me buzëqeshje. “Në të vërtetë, isha krenare që Carlo më kishte ftuar. Jam lumturuar që e bëra, u kënaqa shumë dhe të paktën isha autentike. Isha vetvetja: e çlirët, ndonjëherë paksa shumë, por në atë moment ndihesha ashtu, prapa skenave kishte një atmosferë shumë të bukur.”
Duke u ndalur te qëndrimi i saj i çlirët, që për disa mund të duket “i tepruar”, Marcuzzi dëshiron të sqarojë një gjë: “Për mua, kritikat janë thelbësore. Nuk ofendohem kurrë, nuk përgjigjem kurrë. Por nga fundi më treguan për një shitstorm që po ndodhte rreth meje. Në rrjet thuhej, madje në mënyrë mjaft agresive, se isha e droguar. Por e vërteta është se unë nuk kam pirë kurrë duhan në jetën time, nuk di as të thith tymin, nuk jam droguar kurrë. E megjithatë, online herë pas here del kjo gjë, më kishte ndodhur edhe në L’Isola dei Famosi.”
“E përsëris, pranoj çdo kritikë, por ky është i vetmi koment që më lëndon. Vajza ime mund të lexojë ‘e droguar’, ‘e dehur’, dhe kjo më mërzit, sepse nuk është e vërtetë. Nëse nuk i kam pëlqyer dikujt, është në rregull, kështu është jeta, por droga nuk më përket aspak. Ndoshta duhet të qetësohem pak,” përfundon duke qeshur moderatorja, e cila foli edhe për jetën e saj private: “Për momentin nuk po kërkoj shpirtin binjak. Kam qenë e dashuruar, por tani po shijoj kohën për veten time, që është diçka e mirë. Me fëmijët e mi dhe me miqtë.”
