Papa Françesku, 88 vjeç, është shtruar në Poliklinikën Agostino Gemelli në Romë për të kryer disa ekzaminime diagnostikuese dhe për të vazhduar trajtimin e bronkitit në mjedis spitalor, sipas një deklarate nga zyra e shtypit e Vatikanit.
Pavarësisht gjendjes së tij shëndetësore, Papa ka vazhduar të përmbushë detyrimet e tij ditore. Mëngjesin e së premtes, ai zhvilloi disa audienca, përfshirë një takim me kryeministrin sllovak, Robert Fico. Pas përfundimit të këtyre angazhimeve, ai u shtrua në spital për ekzaminimet e nevojshme.
Ditët e fundit, Papa ka përjetuar simptoma të një ftohjeje të fortë, të cilën ai e përmendi gjatë audiencës së përgjithshme të së mërkurës, më 5 shkurt. Më vonë, zyra e shtypit e Vatikanit konfirmoi se ai po trajtohet për bronkit. Gjatë audiencës, Papa i kërkoi një bashkëpunëtori të lexonte katekizmin në vend të tij, duke shpjeguar: "Po kërkoj nga prifti që të vazhdojë leximin, sepse me bronkitin tim nuk mundem ende... Shpresoj që herën tjetër të mundem".
Kjo nuk është hera e parë që Papa përballet me probleme shëndetësore gjatë muajve të ftohtë. Në fund të dimrit të vitit 2023, ai pësoi një përkeqësim të papritur të gjendjes shëndetësore për shkak të një inflamacioni të bronkeve dhe u shtrua me urgjencë në të njëjtin spital. Më vonë, ai rrëfeu se bëhej fjalë për "një pneumoni të rëndë dhe akute në pjesën e poshtme të mushkërive".
Gjatë sezonit të ftohtë, Papa është nën mbikëqyrjen e një ekipi mjekësor dhe i nënshtrohet trajtimeve me ilaçe kortizonike për të menaxhuar gjendjen e tij shëndetësore.
Aktualisht, nuk ka informacione të mëtejshme mbi gjendjen e tij shëndetësore, por pritet që Vatikani të ofrojë përditësime në vijim.
