Sipas Franc Kafkës vjeshta është stina më e trishtë e vitit...

Sa të ndjeshëm bëhemi në vjeshtë? Sa melankolikë? A i veshim edhe shpirtit ato ngjyrat e tokës që ngjajnë disi të trishtuara, por janë një tablo e mrekullueshme pikture?!

Vjeshta ka frymëzuar shumë artistë. Unë e dua për të gjitha gjethet e rëna dhe besimin për të shkëlqyer përsëri në pranverë. Ashtu si ne njerëzit! Kjo stinë ka elegancë të fshehur, si eleganca që fshihet në shpirtin e njerëzve.

Sa elegant është shpirti yt?

Disa njerëz janë të moshuar që në moshën 20 vjeç. Plakja ndodh kur një person i humb ëndrrat nga sytë, pavarësisht nga numri i viteve që ka jetuar.

Elegancë do të thotë “hir i rafinuar”. Më pëlqen ideja për të qenë një qenie që ecën në një hapësirë të hirit të rafinuar. Jam gjithmonë e interesuar të kultivoj një qasje elegante ndaj jetës.

Elegancën shpirtërore ne e shohim në mënyrën si ecim, kujdesin ndaj lëkurës, mënyrën si e mbajmë filxhanin e kafesë, por ajo është shumë më tepër se kaq… Nuk është e dukshme.

Fshihet në format e altruizmit, lentet e syve tanë. Si zgjedhim ta shohim botën rreth nesh? Sa të ëmbël tregohemi edhe pasi kemi kaluar një ditë të vështirë?

Kjo, është eleganca e shpirtit.

Një nga gjërat më të bukura që e mban shpirtin tonë gjithmonë elegant, është përqafimi i papritur. Lidhuni me ata që ju rrethojnë sot. Mbajini fort afër vetes. Thuaj: “Të dua”, “Më fal”, “Të vlerësoj”, “Jam krenare për ty”… çdo gjë që ti në fakt, e ndjen. Mos u kurse, mos e lër për më vonë. Nuk ka kohë. Koha është një gënjeshtër e madhe.

Dërgoni mesazhe të rastësishme, shkruani një shënim të lezetshëm dhe vendoseni në hapsirën e dikujt që e keni përzemër, përqafoni të vërtetën tuaj dhe ndajeni atë. Bëhuni shkak i një buzëqeshje sot për dikë tjetër… dhe jepni shumë, shumë dashuri.

Unë besoj që kjo është forma më e bukur për të jetuar… dhe shpirti mbetet gjithmonë elegant, magnetizues, i ri.

Eleganca shpirtërore është epitoma e një jete të shëndetshme. Është ura që lidh të gjitha rrugët e dashurisë. Asaj të padukshmes është koha t’i japim më shumë rëndësi sesa elegancës fizike. Nuk ka asnjë filtër për elegancën shpirtërore. Ajo është e pastër ose thjesht nuk është.

Sot ka nevojë t’i japim sa më shumë “Likes”, ta kthejmë në “trend” e në stil jetese… si kryefjalën e vetme të vërtetë, të mirëqënies sonë - elegancën dhe mirësinë e shpirtit.