- Si fillim, ndiqni në Instagram ‘Andaras Architecture & Design’.

-Nëse i keni bërë follow, mund të fillojmë.

-Gati tani?

Nuk ishte një prej takimeve të programuara me laps e letër, as nga ato fare të rastësishme që palët ndonjëherë rezervohen të thonë gjërat që duan. Por ishte krejtësisht i vërtetë, me tematika të qarta, të cilat Nina dhe Arbri, të zotët e shtëpisë së studios së arkitekturës “Andaras Architecture & Design”, na kishin rezervuar. Ngurrimi i fillimit dhe konfuziteti nga pamjaftueshmëria e informacionit në këtë fushë, na u shua shpejt, sidomos nga dëshira e çiftit të arkitektëve për të na i ofruar me detaje objektivat dhe pritshmëritë e këtij projekti jo të zakontë. Dhe sado jashtë fushës të ndihesh në nisje, pasioni dhe dëshira me të cilat Nina dhe Arbri flasin për arkitekturën, të bëjnë shpejt kureshtar. Të paktën, aq sa për të kuptuar një filozofi pune sa specifike, aq edhe madhështore në zbatim dhe në realizim. Kush nuk ka mbetur i mahnitur nga vepra të tilla si “Demi” apo “Santa Quaranta” në Sarandë, “Miamar” në Livadh apo dhjetëra rezidenca e vila të mrekullueshme përgjatë bregut, të cilat mbajnë firmën e “Andaras Architecture & Design”?

Ky i fundit nuk është emri i një marke veshjesh apo aksesorësh, që shumica prej nesh nxitojmë të blejmë (sidomos në prag festash) për t’i shtuar gardërobës një gjë të bukur dhe sa më jetëgjatë. “Andaras Architecture & Design” ka një vizion më të qartë – përtej markës, një koncept të ri për arkitekturën: “Të bëjmë arkitekturë të mirë. Arkitekturë e mirë do të thotë të punosh me klientin, të transformosh të parëndësishmen në diçka më shumë – atë që kurrë nuk ke guxuar ta imagjinosh”. 

Nina dhe Arbri, partnerë në profesion dhe në jetë, prej pak kohësh kanë marrë përsipër showroom-in e eventeve dhe zyrave të Alketa Vejsiut, CLASS. Natyrisht, edhe këtu, si në çdo projekt që marrin përsipër, do të bëjnë më të mirën e tyre. Por ndryshe nga të gjitha herët kur flasin vetëm me vepra madhëshore, të jashtëzakonshme, këtë radhë kanë preferuar që të thonë diçka edhe me fjalë. Për të qenë më afër publikut. Nuk janë çifti i showbiz-it, që ne ruajmë në çdo hap për të zbuluar çfarë kanë të re, as çifti që “përfitojnë” nga rasti të jenë pjesë e një kopertine digjitale, por u bënë pjesë e “lojës” për ta shpërndarë pasionin që kanë për arkitekturën dhe për punën e tyre. Ajo që në thelb (megjithëse shihet me skepticizëm nga mungesa e informacionit) është një vepër arti...

Për “Andaras Architecture & Design”, për krijimin e një ëndrre që vazhdojnë ta ndjekin hap pas hapi, Nina dhe Arbri zgjodhën të ndalen në një stacion: revistën Class. Këtu rrëfejnë pa doreza të gjithë rrugëtimin e tyre që nga fillimet e studios dhe deri sot, kur projektet e tyre i kanë kaluar kufijtë e Shqipërisë: “Çdo projekt duhet të jetë i veçantë, i mirëstudiuar, të ketë identitet, teknikisht i saktë dhe i zbatueshëm, duke ofruar gjithmonë risi në fushën e arkitekturës, që secili nga këto objekte të flasë për kohën në të cilën është ndërtuar”, – thonë Nina dhe Arbri duke theksuar se çdo projekt i tyre veçohet nga origjinaliteti. Është ai që të bën të kthesh kokën dhe të qëndrosh gjatë aty duke zilepsur duart e tyre të arta që arrijnë të projektojnë objekte jashtë imagjinatës dhe fare pranë ëndrrës.

- Si u krijua ‘Andaras Studio’ dhe çfarë përfaqëson ajo?

‘Andaras Studio’ lindi si një dëshirë për të krijuar një zyrë arkitekture, e cila do të ofronte shërbime të ndryshme arkitektonike, exterior dhe interior të tipologjive të ndryshme, si filozofi e re në projektimin e këtyre strukturave ku nisi ishte projektimi i strukturave hoteliere.
Krahas hoteleve, studioja jonë projekton edhe tipologji të projekteve industriale, bar – restorante dhe objekte rezidenciale, vila dhe apartamente. Kohët e fundit kanë marrë zhvillim edhe strukturat e agroturizmit.
Ajo që ne i kushtojmë rëndësi është që çdo projekt të jetë i veçantë, i mirëstudiuar, të ketë identitet, teknikisht i saktë dhe i zbatueshëm, duke ofruar gjithmonë risi në fushën e arkitekturës, që secili nga këto objekte të flasë për kohën në të cilën është ndërtuar.

- Si u bëtë bashkë ju të dy në këtë biznes, nga dashuria apo nga puna?

Njohja jonë daton që në kohët e universitetit. Arbri është diplomuar në arkitekturë, ndërsa unë jam inxhiniere ndërtimi. Vite më pas, në 2011-ën, ne vendosëm që të krijonim studion tonë të arkitekturës, si vazhdim të bashkëjetesës sonë edhe në jetën private.
Ajo që ne synonim të krijonin ishte ngritja e një ekipi arkitektësh me dëshirën dhe pasionin për të krijuar arkitekturë të mirë me frymë kontemporane.

- E mbani mend klientin e parë që shërbeu edhe si ogur i suksesit tuaj?

Fillimin e mbajmë mend shumë mirë. Ishim plot me dëshira, synime të qarta ku donim të arrinim, po në të njëjtën kohë edhe me pasiguritë se si “Andaras Studio” do të përballonte tregun, i cili, asokohe ishte i vështirë dhe konkurrenca ishte e fortë.
Projekti ynë i parë ka qenë një hotel në bregdet, që në atë kohë u emërtua si projekti që ndryshoi filozofinë e funksionimit të një strukture hotelerie. Ky ishte projekti me të cilin goditëm dhe, në njëfarë mënyre, përcaktoi se cilat do të ishin pikat tona më të forta në vitet në vijim – hotelet.
Sot që flasim, pas 10-vjetësh, “Andaras Studio” ka në portofolin e saj më shumë se 40 hotele të projektuara në të gjithë Shqipërinë. Por nuk mbeten pas as bar-restorantet, vilat, apartamentet që janë një tipologji tjetër, së cilës ne gjithashtu i kushtojmë shumë rëndësi.

Cila është pika e fortë e “Andaras Studio”?

Pika jonë e fortë është puna e grupit. Gjithmonë e kemi parë produktin tonë jo si punë individuale, por si bashkëpunim të një grupi arkitektësh. Kjo na lejon të diskutojmë, të rrahim mendime, të japim zgjidhje edhe nga ato më të vështirat, që kur i diskutojmë më pas dalim në zgjidhjen optimale.
Pika jonë e fortë është propozimi i konceptit bashkëkohor, ku ndërthuret forma, estetika, teknika e saktë dhe materialet e fundit.
Eksperienca ndër vite me objekte të ndryshme, që kanë qenë të mëdha për nga rëndësia dhe dimensioni, na bën që klientëve t’u japim sigurinë që ajo që ne projektojmë është ajo që ata kërkojnë për investimin e tyre.   

- Cilët janë klientët potencialë të studios suaj?

Klientët tanë janë të ndryshëm, duke filluar që nga pronarët e apartamenteve dhe vilave për të vazhduar deri tek investitorët e hoteleve më 5 yje. Në portofolin tonë kemi shumë punë edhe në projektimin e ambienteve si: zyra të mëdha korporatash, objekte industriale për kompani të ndryshme, klinika dentare, farmaci, kopshte për fëmijë dhe qendra kids club, qendra estetike dhe showrooms prestigjioze eventesh, pika karburantesh, beach bare, lounge, club etj.

- Cilat janë projektet tuaja më të njohura për publikun?

Pa diskutim janë hotelet: projektimi i hotel “Santa Quaranta” në Sarandë, një resort i mirëfilltë. Ne kemi projektuar të gjitha ambientet që janë pjesë e këtij resorti. “Miamar”, hotel në Livadh, Himarë, është një nga hotelet që ndryshoi konceptin e hotelerisë me 5 yje në Shqipëri. Çdo ambient është i projektuar nga ne duke i dhënë rëndësi çdo detaji të jetë sipas standardit të një strukture hoteli me 5 yje. Kemi dashur që objekti të përçojë veçantitë që e karakterizon si në exterior, si në ambientet e rekreacionit, ashtu edhe në interior, ku çdo dhomë hoteli është unike, komode, estetike, të ofron çdo gjë që çdo dhomë hoteli e këtij standardi duhet të ketë.

Hotel “Demi” në Sarandë, një kompleks i mirëfilltë me një standard të rafinuar në arkitekturë. Standard i lartë në dhoma, kemi ruajtur të njëjtin koncept dhe nivel edhe në bare, lounge, restorante, clube, të cilat i kemi projektuar ndër vite. Kjo tregon pse klientët tanë kthehen tek ne vit pas viti, pasi ne u japim vlerë investimeve të tyre.

Hotel “Andon Lapa 1”, Sarandë, një nga hotelet që kemi bërë ‘extreme makeover’ – transformim total të hotelit ekzistues. Këtu nuk dallohet nëse është ndërtuar i ri apo jo. Vazhdojmë edhe sot të projektojmë hotelin e 3-të brenda këtij kompleksi. 

Hotel “Flower Residence” në Golem, hotel “Senator”, Tiranë, hotel “Butrinti” rimodelim fasadë, hotel “Uji i ftohtë”, Tepelenë dhe një listë e gjatë hotelesh të tjerë.

- Cilat janë gjërat për të cilat kujdeseni më shumë gjatë një projektimi?

Kujdesemi shumë që projekti të jetë shumë estetik, i kushtojmë shumë vëmendje grafikës, po të njëjtën vëmendje që i kushtojmë edhe projektit teknik. Ky ka qenë edhe çelësi që na ka mundësuar të punojmë në të njëjtën kohë në lokacione me distancë të madhe nga Tirana, në Shqipëri dhe jashtë saj.

- Po marrëdhënia me VIP-at, mund të përmendni një objekt ku ju ka shkuar puna shumë mirë?

Një nga objektet që ka pasur vëmendjen tonë këtë vit është, pa diskutim, edhe showroom-i i eventeve dhe zyrave të Alketa Vejsiut, CLASS. Nuk njiheshim më parë, por puna dhe rrjetet sociale shërbejnë për të krijuar kontakte në kohët tona.

Projekti ynë, patjetër që do të nxjerrë në pah më të mirën e një showroom-i të tillë, që organizon eventet më IN në kryeqytet, por, nga ana tjetër, çdo ambient; zyra, atelie, dhoma prove etj., janë projektuar me vëmendjen tek njerëzit që do të punojnë aty, por edhe te klientët që do e vizitojnë, që të ndihen të veçantë.
Projektet tona këtë bëjnë, bëjnë njerëzit të ndihen mirë dhe të vlerësuar.

A veproni gjithmonë me kompetenca të plota mbi një projekt apo çdo gjë është në dorë të investitorit?

Projekti që ne bëjmë është, pa diskutim, reflektim i stilit tonë, mënyrës sonë të të konceptuarit, por, nga ana tjetër, kjo vjen e ndërthurur me atë që kërkon klienti. Apartamentet, vilat duhet të reflektojnë, së pari, dëshirat e atij që i posedon, pasi janë shumë personale.
Ambientet që janë pjesë e një përdorimi më të gjerë, siç janë baret, restorantet, hotelet, klinikat, showroom-et duhet të reflektojnë stilin e objektit në tërësi dhe këtu mundohemi të qëndrojmë aktualë, në stil, të sugjerojmë, të guxojmë më shumë si në ngjyra, në stil, në materiale.

- Në cilën fazë merret një projekt për t’u punuar nga studioja juaj?

Nuk ka një fazë të caktuar. Çdo moment është momenti i duhur për të shkuar në një studio arkitekture. Më e mira do ishte që në konceptim, pra para se një investim të marrë jetë, ne diskutojmë me klientin të gjitha kërkesat e tij dhe dalim në një produkt final. Ndodh shpesh që objektet janë ekzistuese dhe ne duhet të ndërhyjmë dhe të sjellim diçka të re, pra të adoptojmë. E rëndësishme është që në secilin rast të vlerësojmë të gjitha kërkesat dhe kushtet teknike dhe të ndërtojmë strategjinë që do të mbajmë.

- Cila është pika më e rëndësishme tek e cila mbështeteni kur i thoni “PO” një projekti?

Ne mbështetemi tek aftësitë tona, tek kapacitetet tona për të dorëzuar një punë me cilësi dhe në afatet kohore për të cilat kemi rënë dakord paraprakisht. Mbështetemi tek eksperienca jonë dhe tek kërkimet tona të vazhdueshme, tek bashkëpunimet me specialistë të fushave të tjera për t’i dhënë zgjidhje çdo problematike që mund të na dalë në objekt. Në këtë kuadër, udhëtojmë shpesh në vende të ndryshme të Evropës dhe jashtë saj për të sjellë trendet e fundit në interior dhe materiale.
Marrim pjesë në panaire të ndryshme për t’u përditësuar me teknologjinë e fundit të ndërtimit dhe materialet e reja që dalin çdo ditë për të qenë sa më aktualë. Investojmë tek teknologjia për të nxjerrë një produkt dhe grafikë të mirë.

- Cili është vizioni që po projektoni për të ardhmen?

Vizioni ynë është të bëjmë arkitekturë të mirë. Arkitekturë e mirë do të thotë të punosh me klientin, të transformosh të parëndësishmen në diçka më shumë, që kurrë nuk ke guxuar ta imagjinosh. Do të thotë ide novatore, materiale të duhura dhe, mbi të gjitha, vëmendje ndaj detajit. Vizioni ynë është të vazhdojmë të rritemi, brenda dhe jashtë Shqipërisë, në kërkim të tregjeve të reja, me të njëjtin pasion si ditën që e nisëm këtë rrugëtim.

Të projektosh një ëndërr dhe ta hedhësh atë në letër është për ne e pamundur. Për ta, e mundur, nëse i ke të qarta idetë dhe, mbi të gjitha, ke besimin që gjithçka është e zbatueshme, funksionale dhe në shërbim të njeriut. I gjithë ky rrugëtim i Ninës dhe Arbrit, i nisur më shumë se një dekadë më parë, sot ka një portofol të ngjeshur veprash arti në të gjithë vendin, por edhe jashtë tij. Janë ata që na bëjnë ne të tjerëve të besojmë se pasioni dhe përkushtimi të çojnë larg, nëse nuk heq kurrë dorë.

Quajini vizionarë apo largpamës, si të doni, por Nina dhe Arbri ishin sot këtu për t’ju bindur se ëndrrat nuk janë vetëm ato që shohim me sytë e mbyllur. 

Credits: 

Fotografia: Orsola Mema, classphotography.al

Make Up: class_hair_makeup