Nora Gega Klosi është një nga miket e mia më të mira të fëmijërisë dhe në vazhdim…Kemi ndarë momente shumë të bukura në vitet e gjimnazit Petro Nini Luarasi ku Nora ishte një ndër vajzat më të bukura dhe të pëlqyera.

Në një artikull që lexoja për Merylin Monroe asokohe, më kujtohet përshkrimi i dikujt që e njihte nga afër legjendën e bukurisë femërore. Ai thoshte se “Me një buzëqeshje ajo ç’armatoste çdokënd. Kushdo dashurohej me Merylin. Ikona e bukurisë së asaj gruaje, do të qëndrojë  e varur në trurin e shumë burrave e grave të tjera në mbarë globin nuk e di edhe për sa shekuj”. 

Një lloj Merylin do ta quaja Nora Gega Klosin, në versionin Brun; vajzën që të gjithë e donin dhe e duan!

Ai që e dashuron në krye të listës është sigurisht bashkëshorti i saj Blendi Klosi, Deputet i Partisë Socialiste, një politikan karierre i cili në kohën e Ministrisë së Kulturës do ta përpinte me një shikim dhe një propozim që nuk e mendoi dy herë “A do të jesh ti gruaja ime”?

Nga martesa e lumtur e Norës dhe Blendit kanë lindur dy fëmijët, Aron dhe Ambla; duket sikur ngjajnë më shumë nga Nora, hokatarë dhe të qeshur në karakter por edhe të ëmbël e të bukur si e ëma. Sytë ja kanë marrë të atit, ndoshta edhe natyrën për protagonizëm.Në ndryshim nga bashkëshorti, Nora mbetet një vajzë e thjeshtë, diskrete, por e mirë dhe e dashur me të gjithë. Besoj qe është ndër të rrallët njerëz në këtë qytet që nuk  provokon armiqësi edhe pse fsheh një personalitet të vendosur për cështje serioze; vetëm se kjo e dyta nuk i shkon hiç.

Është rritur me shumë dashuri edhe nga familja e saj Nora, me dy prindër të përkushtuar, me mami Zanën që na gatuante kekun special me arra e rrush të thatë kur  isha e ftuar nga shtëpia dhe një vëlla qe nuk i ndante dhuratat sa herë vinte nga Italia ku punonte atëherë.

Nëse duhet ta përshkruajme me pak fjali, ajo nuk mund të të vijë ndryshe në mendje përvecëse si një mami e lumtur që shëtit me makinë me muzikë të lartë në bulevardin e Tiranës duke kënduar e kërcyer  bashkë me dy fëmijët që mundohen ta ndjekin unison në lëvizje  ne sediljet e pasme ku janë montuar dy “carseat”.

Pastaj bëjnë të katërt një xhiro ndrejt Tv Klan tek puna e mamit (ku Nora punon prej vitesh si Drejtuese e Burimeve Njerëzore dhe Drejtore Produksioni, se babai e ka më të vështirë t'i marrë me vete në mbledhje partie e mitingje elektorale). Nora i merr shpesh me vete në punë  kur nuk ka ngarkesa, për t'u dhënë dimensionin e skenës, artit dhe ngjyrave, por edhe për të shpenzuar më shumë kohë me familjen. Po ta pyesësh, është shumë më e prirur që fëmijëve t’jua orientojë zgjedhjet drejt artit sesa politikës.

 

Pastaj një akullore me bebat, pastaj një lojë gjithë përkëdheli, pastaj luftë se kush do rrëmbejë më shumë puthje prej saj, pastaj përsëri në makinë për të drejtuar timonin drejt shtëpisë se vogël e të thjeshtë por shumë të ngrohtë në qytetin e Durresit ku familja Klosi/Gega shpenzon fundjavat.

Janë një familje e lumtur dhe shumë e hareshme, ashtu sic e meriton Nora, një ndër gocat më të mira në këtë qytet dhë një mike nga ato që ngelën përjetë në zemër.